وەگەرد بەرزەوبوین جەنگ حووسیەیل.. واشینتۆن فرۆکەهەڵگریگ ترەک ئەرا خوەرهەڵات ناوڕاس کلکەێد

شەفەق نیوز/ وەزارەت وەرگری ئەمریکا "بینتاگۆن"، ئمڕوو شەممە، بڕیار کلکردن فڕۆکەهەڵگر دویەم ئەرا خوەرهەڵات ناوڕاس دا، لە سای وەردەوامبوین پەلامار ئاسمانی خەس ئەمریکا وەبان حووسیەیل یەمەن.

 وەگورەی سایت خەوەری "بوليتيكو"، بيت هيگسيس وەزیر وەرگری ئەمریکا، فەرمان درویژەوکرن بڵاوبوین بارهەڵگر "هاري ئەس. ترومان" دا، ئەرا مانگیگ ترەک دا.

بڕیارە لە هەفەتەیل ئایندە فڕۆکەهەڵگ "كارل فينسون" وە یاوەری ویرانکەرەیل بڕەسێد، دویای تەواوکردن ئامادەیی هاوبەش وەرد ژاپۆن و کۆریای باشوور لە دەریای چین خوەرهەڵاتی.

ئی جویلە دویەمە لەیجویرە لە ماوەی شەش مانگ گوزەشتە، وەلێ یەکەمە لە ئیدارەی دۆناڵد ترەمپ، لە وەختیگ واشینتۆن دووپات کەێد کە ناوچەی ئاسیا و زەریای ئارام گرنگی ستراتیژی ئەرا هیزەیل دەریاوانی و ئاسمانی ئەمریکی دیرن.

 لە هەفتەی گوزەشتە، تێومپ لەبان پلاتفۆرم  "تروس سۆشيال" دووپات کرد کە ئەو حووسیەیلە کە لەلایەن ئیرانەو پاڵپشتی کریەن ئەوەسا وەتەواوی لەناودریەن، لە ئەنجام گورزەیل ئاسمانی ئەمریکی، و داوا لە تەهران کرد واز لە کلکردن ئامرازەیل سەربازی ئەرایان بارێد.

لە شەو شەممەی گوزەشتەو، سوپای ئەمریکا وەردەوامە لە پەلامارەیلی لەبان شار و شوینەیلیگ لە یەمەن، کە بویەسە مدوو کەفتن دەیان قوربانی، ژن و مناڵ هاناویان، و ویرانکردن بینایەیلیگ نیشتەجییوین و بڕیان کارەبا لە چەن ناوچەیگ، لە وەختیگ دۆناڵد ترەمپ سەرۆک ئەمریکا هەڕەشەی ئیران دا، کە وەرپرسایەتی هەر گولەیگ لەلایەن حووسیەیل یەمەن باێد کەفێدە مل ئەو.

لە تشرین دویەم   2023ەو، حووسیەیل پەلاماردان کەشتیەیل ئیسرائیلی و ئەمریکی لە دەریای سوور و خەلیج عەدەن و دەریای عەرەبی دەن وە مووشەک پالیستی و فڕۆکەی بێفڕۆکەوان و بەلەم، ئەوەیش شانوەشان جەنگ غەززە.