گولەی ویڵیگ نیە.. مووشەک ویڵیگە
![گولەی ویڵیگ نیە.. مووشەک ویڵیگە](https://arcellabucket.fra1.cdn.digitaloceanspaces.com/media/arcella/1620292885374.jpg)
شەفەق نیوز/ مەردم ناوچەیل خوەرهەڵات ناوڕاس و باکورور ئەفریقیا، لە دویای خەوەر ئەو مووشەکە ک لەدەس وڵات چین دەرچگە، و ئازاد و بێ خاوەن مەرقەز کریاسە ئاسمان، و شایەت لە هەر وەختیگ، لە هەر شوینیگ، مووشەکیگ ویڵ ٢٠ تەنی بکەفێدە خوار.
بڕیگ وە نیگەرانی فرەیگ باس ئی مووشەکە کردن، و بڕیگ ئومیدیگ وەی مووشەکە دیرن، بەشکی بڕمیەێدە مل دوژمنیگ، و بڕیگ باس مووشەکەگە کردنە هەنەکی، چ جوور رسواییگ ئەرا توانای وڵات چین، یا جوور بیباکییگ وەی سەردەم پڕ لە جەنگ و پەتا و کارەسات سروشتییە، و بڕیگیش جوور فیلمیگ رخبەر لە دەرهێنان وڵات چین وەپی نووڕێد.
پسپۆڕەیل ئاسمانی، هووشداری لە گلەوخواردن بەشە سەرەکیەگە لە مووشەک مەرەقەزکریاگ «لۆنج مارتچ 5 بی» ٢٠ تەنی وەرەو زەوی کردن.
فرە لە مەردمەگە گریەی مووشەکە مەرەقەزکیای وەرەڵاگە وە ڤایڕۆس کۆڕۆنا بەسان، ک هەردوگیان لە وڵات چین مەرەقەز کریان، تا هەڕەشەی جهان بیەن.
بەشیگیش پرسیار کردن ئایا ئەرا وڵات چین ئەونە رکدارە خەڵک ئی زەویە بیزار بکەێد!.
جونتان ماکدویل زانای فیزیایی، نشان دا ک هووکار نەزانستن شوین گلەوخواردن مووشەکە چینیەگە وەرەو ناو زەوی ئەوەسە ک بەشە سەرکیەگەی ئی مووشەکە هەر ٩٠ خولەک یەک جار گڕیگ خوەێدە دەورگرد زەوی.
وەلی جوناسان ماکدویل زانای فیزیایی ئویشێد لە خراوترین شیوەیش، کارەگە جوور کەفتن فڕۆکەی بویچگیگ بوود، و مووشەکەگە لە مەوقەی داوەزینی لە تووکڵ زەوی پارچە پارچەو بوود، وەلی دیار نیە پارچەیلی وەگورەی چەنیگ بوون، باوجی هەر چەنیگ بوون هەر زەرەدیگ دەن.