کوشیان 3 کەس وە گورز ئیسرائیل لە باشوور بەیروت
شەفەق نيوز/ سوپای ئیسرائیل، شەفەق ئمڕوو سێشەممە، گورزیگ ئاسمانی وەبان زاحیەی باشوور بەیروت جیوەجی کرد، ئەندامیگ لە حزبولڵا کردە ئامانج، کە وەگورەی دەسەڵاتەیل لوبنان سێ کەس کوشتیە، وە دویەم پەلامار لەیجویرە رەسێدە شوینەیل حزبولڵا، دویای دەسکردن وە ئاگربەسی ناوەین لوبنان و ئیسرائیل، لە تشرین دویەم گوزەشتە.
سوپای ئیسرائیل لە بەیاننامەیگ هاوبەش وەرد دەزگای ئاسایش ناوخوەیی (شاباک) وت: ئەو گورزە تیرۆرستیگ لە حزبولڵا کردە ئامانج، کە بەڵەی ڕەنکامەیل حزبولڵا داگە، و دەسمیەتییان داس لە پلانیگ ئەرا پەلاماردان تیرۆری گەورەیگ نزیکبوی وەبان مەدەنیەیل ئیسرائیلی جیوەجی بکەن.
وتیش: لەوەر ئەو هەڕەشە کە ئی تیرۆستە دروسی کردگە، سوریا و شاباک کەفتنە جویلە ئەرا لەناوبردنی و لاوردن هەڕەشەگە، وەبی ئاشکراکردن ناسنامەی ئەو کەسە کە وە گورزەگە کریاسە ئامانج.
بەیاننامەگە دووپاتیش کرد کە سوپا و شاباک هەر وەردەوامن لە کار ئەرا نەهیشتن هەر هەڕەشەیگ وەبان دەوڵەت ئیسرائیل.
لە بەیروت، وەزارەت تەندروسی لوبنان وت: گورز دوژمن ئیسرائیلی وەبان زاحیەی باشوور، لە ئاماریگ سەرتایی، بویە هوکار کوشیان سێ کەس و زەخمداری هەفت کەس ترەک.
تا ئیسە حزبولڵا هویچیگ وەبان ئی گورزە وەبان شوینەیلیگ نەوتیە.
ئی گورزە دویای هوشداریکردن بنیامین نتنیاهو سەرۆک وەزیرەیل ئیش لە هەفتەی گوزەشتە تیەێد، کە وت: سوپای ئیسرائیل ئەوەسا لە هەر شوینیگ لە لوبنان دەێد لە هەر هەڕەشەیگ.
لە لوبنان پایتەخت، کوو رووژنامەوانی لە ئاژانس فرانس پرێس دەنگ رممەی بەرزیگ وەرجە ساعەت چوار شەفەق (01,00 وەخت گرینتش) ژنەفتن، و لە پشتی دەنگ بووڕەی فرۆکە هات.
پەیامنێر ئاژانسەگە لە شوین گورزەگە دوو قات لە بینایگ چەن قاتی دی کە ویران کریا، و مەردم وە دڵنگ خەفتن لە ماڵەیلیان دەرچگن کە دویای گورزەگە زیڕە کردنە.
وەگورەی پەیامنێر فرانس پرێس، تیمەیل فریاکەفتن حزبولڵا و بزووتنەوەی ئەمەل هاوپەیمانی، سێ زەخمدار لەلای کەمەو ئەرا خەسەخانە بردن، و شوفەڵ شوین رمیاگەیل لاوردیاد.
ئەو بینا کە کریاسە ئامانج، وە چەن مەتریگ لە بینایگ ترەک دویرە کە لە جەنگە دوو مانگیەگە ناوەین حزبولڵا و ئیسرائیل لە ساڵ گوزەشتە ویران کریا، کە حزبەگە دویای ئەو جەنگە فرە هازی کەمەو بوی.
