کوشیان و زەخمداری چەن مەدەنییگ وە گورز ئیسرائیل لەبان حومس سوریا
شار حومس و ئاوایەگەی.
سانا بڵاو کرد کە: “سیستم وەرگری ئاسمانیمان وەڵام مووشەکەیل دەستدرویژی دادەو و بەشیگیان خستە خوارەو.”
سانا لە زوان سەرچەوەیگ سەربازیی وت “نزیکەی ساعەت ٣٠:٠٠ی شەفەق ئمڕوو (چوارشەممە)، ئیسرائیل دوژمن گورزەیل ئاسمانی ئەرا باکوور تەرابلوس وەشان و شمارەیگ خاڵ لە شار حومس کردە ئامانج”.
سەرچەوەگە دیاری کرد کە پەلامار ئیسرائیل بویە هووکار گیانلەدەسدان و زەخمداری شمارەیگ هاوڵاتی مەدەنی، و بڕیگ زیان ماددیش کەفتە موڵک گشتی و تایبەت.
ڕوانگەی سوری ئەرا مافە مرۆڤ بڵاو کرد کە لە پەلامارە ئاسمانییەگەی ئیسرائیل چوار کەس کوشیانە کە دوو کەسیان مەدەنی بوین.
رامی عەبدولڕەحمان، وەڕێوەبەر ڕوانگە ئەرا ئاژانسی فرانس پرێس وت "لە پەلامارەیل ئیسرائیل لەبان شار حومس چوار کەس کوشیانە کە دوو کەسیان مەدەنی بوین".
هەفتەی گوزەشتە لە وەڵام پەلامارەگە کە هیزەیلی لە ئوردن کردە ئامانج، ئەمریکا چوار پەلامار کردە بان باڵەیل لایەنگر ئیران لە سوریا و عراق و لە ئەنجامی دەیان کەس کوشیان.
لە مانگ یەک ئمساڵ، پەلامارەیل ئیسرائیل لە نزیک دیمەشق، ٨ کەس کوشتنە کە لە ناویان چەکدارەیل لایەنگر ئیران بوین، وەگورەی ڕوانگەی سوری ئەرا ماف مرۆڤ.
لە ماوەی ساڵەیل گوزەشتە ئیسرائیل سەدان پەلامار ئاسمانی لە سوریا ئەنجامدا و وە شیوەیگ سەرەکی ئامانجەیل ئیران و حزبولڵا کردە ئامانج، لەوانە کۆگا و بارکردن چەک و تەقەمەنی بوی و هەمیش شوینەیل سوپای سوریا.
بەڵام ئی پەلامارەیلە دویای هیزگردن جەنگ لە غەززە تونترەو بوین دویای پەلامار بیوینەی حەماس کە لە ٧ ئۆکتۆبەر لەبان ئیسرائیل جیوەجی کرد.
