کوشیان و زەخمداری ٤٠ کەس وە رویداو تلیان بڕیگ مەردم لە ئەمریکا
شەفەق نیوز/ دە کەس گیانیان لەدەسدان و ٣٠ کەسیش زەخمدار بوین، شەوەکی ئمڕوو، دویای هاتن ماشینیگ وەبان بڕیگ مەردم لە نیو ئۆرلیانز لە ئەمریکا.
ئاژانس ئامادەکاری ئەرا کارەساتەیل لە شار "NOLA Ready"، خەوەردا لە رویداو زەخمداریوین بڕیگ کەس لە ئەنجام تلیان لە چواڕییان جادەی کاناڵ و بۆربون، کە لەورا مەردمیگ ئاهەنگ ساڵ نوو کەن.
تووڕ سی بی ئێس نیوز لە زوان وەچەودیەیل وت: ماشینیگ وە تونی بەرزیگ مەردمەگە تلان، ئمجا رانندەگە دەرچگ و دەسکردە تەقەکردن، و پولیسیش تەقە لەلی کرد.
ئاژانسەگە باس توومارکردن زەخمداری ٣٠ کەس کرد، کە ئەرا خەسەخانەیگ لە نیو ئۆرلیانز بریان، وەگەرد مردن ١٠ کەس.
وەچەودیەیل وتن: رویداوەگە بویە زیڕە، و تووڕ سی ئێن ئێن ئەمریکی لە زوان کیڤن گارسیا (٢٢ساڵان) دویای ماوەی کوڵیگ لە رویداوەگە وت: هەر ئەوە دیم ماشینیگ کەسەیل کەنار چەپ ریەگە لە بۆربون تلان، ئیجا دەنگ تەقەکردن هات.
خانمیگ وەناو ویت دەیڤیس (٢٢ساڵان) لە شریفبۆرت لویزیانا وت: هەناێ خوەی لەناو یانەی شەوانە بویە لە جادەی بۆربون رویداوەگە قومیا.
ویت وت: مەردم گشتی دەسکردنە قیژە و دەوکردن وەرەو دویا.
وتیش: هەناێ ری وەپیمان دریا تا لە یانەگە بچیمنە دەیشت، پولیس وەپیمان وت بایەسە وەزوی لەو ناوچە دەرچین، و لاشەی چەن کەسیگ دیم کە نەتوەنست بانیان بپووشن، و مەردم فرەیگ زەخمدار فریاکەفتن سەرەتایی وەگردیان.
دەیڤیس وتیش: پولیس داوا لە مەردم لە شوین رویداوەگە کرد مۆبایل دویر بخەن، و وەزوی لەی شوینە درەچن.
