کوشیان و بیسەروشوینی 68 کووچبەر دویای نقومبوین بەلەمیان وەرانوەر کناراوەیل لیبیا
شەفەق نيوز- ترابلوس
ریخریاگ کووچبەری ناودەوڵەتی، ئمڕوو سێشەممە، خەوەردا لە کوشیان 18 کووچبەر وهیمان 50ی ترەک وە بیسەروشوین دریانەسە قەڵەم، دویای نقومبوین بەلەمیگ وەرانەور شار توبرق لە خوەرهەڵات لیبیا لە سەرتای ئی هەفتە.
ریخریایەگە وتیش: دە کەس وەزنی پەیا کریان وەگورەی ئاژانس رۆیتەرز.
توبرق شاریگ کناراویە کەفێدە نزیک سنوور میسر.
لە مەوقەی رمیان موعەمەر قەزافی لە راپەڕینیگ وە پشتگیریکردن هاوپەیمان باکوور ئەتڵەسی لە ساڵ 2011، لیبیا بویە دەوڵەتیگ ئەرا رەدبوین ئەوانەگ لە جەنگ و لاتی وەرەو ئەوروپا لەڕی بیاوانەو و لە دەریای ناوڕاسەو خوەیان قورتار کەن.
ریخریاگ کووچبەری ناودەوڵەتی وت: ئی نەهامەتی دوایییە وەهویرخستن زاقیگە لەو رخدارەیل مەرگبارە کە ناچار مەردم کەن بچنە ناویان وە مینەی ئاسایش و دەرفەت، و هیمان لیبیا خاڵ رەدبوین سەرەکیە ئەرا کووچبەر و پەنابەرەیل، کە فرەیان تویش زیان تیەن و کاروانەیلیگ ژیانیان خەێدە ژیر هەڕەشە.
