کوشیان کووچبەریگ عراقی لەناو دوکانەگەی لە ئەمریکا

شەفەق نیوز/ میدیایل راگەیانن ئەمریکا، ئمڕوو پەنجشەممە، خەوەردان لە کوشیان پیاویگ عراقی، دویای پەلاماریگ چەکدار لەبان دوکانەگەی لە شار شیکاگۆ لە ویلایەت ئیلنۆی، و کامیرایل چەودیری نشان بکوشەگە دان ک دەمچەوی وە دەمامەک پزشکی پووشیە.

تووڕ CBS  شیکاگۆ وت: پیاویگ عراقی لە گەڕەک وێست ریدج لە شار شیکاگۆ نیشتیە، وە پەلاماریگ چەکدار لەلایەن کەسیگ کوشیایە، دویای ئەوە ک دوکانەگەی کەفتە وەر دزیکردن.

تووڕوگە وتیش: تەقەکردن لەناو دوکان ( J & K Food & Liquor) بوی، و سەلیم خەمو لە تەمەن ٦٦ ساڵە لەناوی کوشیا.

پارچە ڤیدیۆی کامیرایل چەودیری نشان ئەو کابرا دەێد ک پەلامارەگە جیوەجی کەێد و وە کووڵ پایسکل تیەێد، ئیجا چوودە ناو دوکانەگە، دویای کەمتر لە نیم خولەک وە زوی دەرچوود.

کابراگە مەوقەی وایینی مۆبایلەگەی لەلی کەفێد، و پۆلیس وت: خاوەن دوکانەگە تەقە لەلی کریا، و ئەوەیش تەقە لە کابرا کرد، و دیارە ک زەخمداری نەکردیە.

تووڕوگە ئویشێد: خەمو، ئەو کووچبەر پەنابەرە لە عراق، پلان دانایە لە مانگ ئایندە خانەنشین بوود.

کابرای پەلاماردەر لەو شوینە وای و هویچیگ وەپی نەکریا بدزێد، و تووڕەگە لە زوان کوڕ سەلیم خەمو قوربانی وت: باوگم دڵنەرم و رەنجدەر بوێ، ک جویر پەنابەریگ لە ستەم لە عراق دەرچگ، تا ژیانیگ خاستە ئەرا خانەوادەی دروس بکەێد، باوجی ئەو دوکانە بڕوانامەس لەبان کار راسگوی، و فرە شانازی وەو هەمکە سەختیە کرد ک وەخاتر خانەوادەگەی کیشایە.

خەمو سێ کوڕ و هەفت نەوە دیرێد.