کوشیان سێ رووژنامەنویس وە گورزەیل ئیسرائیل لە باشوور لوبنان

شەفەق نیوز/ سێ رووژنامەنویس لە گورزەیل ئیسرائیل وەبان شوین نیشتەجییوینیان لە حاسیبا، باشوور لوبنان، شەفەق ئمڕوو جمعە، گیانیان لەدەسدان.

ئەو سێ رووژنامەنویسە، وەگورەی میدیایل نزیک لە حزبوڵڵای لوبنان، هەرلە؛ غەسان نەجار وینەگر لە کەناڵ مەیادین، محمد رزا ئەندازیار پەخش لە کەناڵەگە، ویسام قایم وینەگر لە کەناڵ مەنار.

زنجیرەی گورزەیل ئیسرائیل شەو جمعە زاحیەی باشوور بەیروت کردە ئامانج، دویای ئاگادارکردن سوپای ئیسرائیل ئەرا دانیشتگەیل شوینەیلیگ لە چەن گەڕەکیگ وە چووڵکردن ماڵەیلیان.

گورزەیل ئیسرائیل رەسینە ناوچەی شوێفات عەمروسیە و حارەت حرێک و حەدەس لە زاحیەی باشوور بەیروت.

ئەو گورزەیلە وەبان شوێفات عەمروسیە دوو بینا رمانن و ئاگر گەورەیگ لەلی هیز گرد، و دویکەڵ سیا ناوچەگە پووشی.