کوشیان زیاتر لە 110 کەس وە زەویلەرزەی تونیگ لە وڵات چین
2023-12-19T06:29:33+00:00
شەفەق نیوز/ وەگورەی میدیایل فەرمی چین کە ئمڕوو سێشەممە بڵاوی کردنە، زەویلەرزەیگ وەتونی 5.9 پلە، شەو دووشەممە لە پارێزگای گانسو لە باکوور خوەرئاوای چین، زیاتر لە 110 کەس کوشتیە.
تووڕ تەلەفزیۆنی دەوڵەتی، سی سی تی ڤی، لە زوان دەسەڵات فریاگوزاری کارەسات لە گانسو بڵاو کرد کە زەویلەرزە سەختەگە بویە هوکار کوشیان 100 کەس و زەخمداری دەیان کەس لەی پارێزگا.
وەگورەی زانیارییەیل ئاژانس فرانس پرێس؛ زەویلەرزەگە لە پارێزگای گانسو لە نزیک سنوور پارێزگای چینگهای رویدایە.
سی سی تی ڤی وتیش: لە شار هایدۆنگ لە پارێزگای چینگهای، زەویلەرزەگە بویە هوکار کوشیان 11 کەس و زیاتر لە 100 کەسیش زەخمدار بوین.
لای خوەییش ئاژانس هەواڵی فەرمی چین (شینهوا) راگەیان؛ زەویلەرزەگە زیان ماددی فرەیگ لەلی کەفتەو، لەلیان رمیان ماڵەیلیگ، و فرە لە مەردمەگە ناچار بوین بچنە ناو جادەیل.
