کورونا، (په‌ره‌ستار شاد)یش، تاسان
شە‌فەق نیوز- لە سەره‌تای پاندومی کورونا ک گشتێ لە تاو کورونا رخ دڕی‌بین، موحه‌مەد رزایی کرماجانی، کومەک بهیار بیس و په‌نج ساڵانێ ک لە هووز پەرەستارەیل کرماشانی بی و مناڵ شار کەنگاوەر بی و دە به‌ش ICU ک هن کورونائییه‌یله ده بیمارستان حەزرەت رەسووڵ مەلارد، شارێ ده نزیکی تێهران، کلیپ ره‌خسێ ده‌رهاورده ده‌ر ک فره قوو و بڵخه کرد ده گشت دنیا.
دە ئی کلیپە، چوون رەفتارەیلێ، وە چەواشەی کار و رەفتار ئداری دە ئێران، کرد وە باو و رێچە‌شکنی داشت ئەڕا خوەێ، هیواداری فرەیێگ خستە رێ.
دە ئی کلیپە، ده نام بیمارستانه‌یله، ژن و پیاگەیل هامکارێ ک ده‌ورەیلە گیروودە و دە کەڕەنتینە مابین و جوور چشتێ زندانی کریابین و بڕێ لەێیان، چەن مانگیش نەتوانستین سەر بدەن وە ماڵ و بنەماڵەی خوەیان و هەوەجە وەێ رووحیە‌بەخشییە فرە دیاری بی.
ئی کارە ریینە ک شادی‌بەخشی فرەیێگ دە وڵات جمان، بی وە سەرمەخشێ ئەڕا گشت کادر درمان و پەرەستارەیلە دە ئێران ک ئەڕا رووحیە داین وە یەکترەکی و تاو هاوردن کادر دەرمان دە وەر وەشت کورونا، فرە لازم بی.
دەو دەورانە، رەخس و گووورانی فارسی و کوردی و تورکی و گیلەکی و مازەنی و ... فرەیێگ لە ژن و پیاگەیل پزشک و پەرەستار، خریا دە وەر چەم وڵات و دوەڵەتیش هیچ نواداری یا شوونگیریێ ئەڕا گرتن ئەوانەی ک ئی کارەیلە دکردن نەکرد و هیچ کامەیان لە سەر کارەیلە‌یان نەکریانە دەر.
ئی چەن رووژە، ئەڕا وە‌ێ‌هەواڵە مردن ئی پەرەستارە دە شەواچەیل مەجازی ئێرانی، بڵخە بی ئەڕا ئی پەرەستار کوردە ک دە سەر خزمەت وە بیمارەیل کورونایی، چەن مانگ پێش، خوەییش تووش کورونا هات و کورونا سووەی خراوە کرد و وە خاتر کورونائیی بیین پفیێ، هناسەبڕ بی و ئی ویرووسە نگریسە تاسانەێ‌وە ئوو دۆمای چەن مانگ، ئاخرێ ئەمر خودا کرد.
هێمانیش، گشتێ لەی پیاگە، وە نێکی و وە نام شەهید سەڵامەت، یاد دکەن.
پەڕەستار شاد، لانامێ بی ک ئەوسا دە ئێران و دە دەرەوەی ئێران، گشتێ نان دە مل ئی خزمەتگوزار مەردمە.
ئی بهیاره، یه هه ده مانگه ک سوور کردگه و ئه‌وسا ک ئی کلیپه‌یل ره‌خسه له خوه‌ێ و هامکاره‌یله نابی، ده‌س وه ده‌زگیران بییه و ده ئی یه‌ک مانگ ئاخره‌گه هه ده بان جی که‌فت‌بی و وه‌رد کورونا دجه‌نگی.
