واشینتۆن.. هەزاران کەس لە وەردەم ماڵ چەرمگ وە پشتگیریکردن ناڕەزایەتیەیل ئیران
شەفەق نیوز/ هەزاران کەس لە واشینتۆن پایتەخت ئەمریکا ک ئیرانییش لەناویان بوی، دەرچگنە ریپیوانیگ وە پشتگیریکردن خوەینشاندان ئیران و وەپا رەسینە ماڵ چەرمگ، وەگەرد دروشم "ژن ژیان ئازادی".
ریپیوانەگە لە ناشیناڵ مۆڵ ک مەیدان گەورەیگە لەناوڕاس شارەگە دەسوەپی کرد، و پەرچەم ئیرانی بەرز کردنە لە ژیر خوەرەگە وەرەو ماڵ چەرمگ روی کردن، و وەدەنگ بەرزیگ ئویشن "ئازادی خوازیمن".
سیاماک ئارام، یەکیگ لە رێکخەرەیل ریپیوانەگە ئەرا ئاژانس فرانس پڕس وت: یە پەنجەم ناڕەزایی هەفتانەس ئەرامان لە واشینتۆن، و شایەت یە گەورتریان بوود، و هاتێ شمارەی بەشدارەیل لە دە هەزار کەس زیاتر بوود.
بەشیگ لە مەردمەگە لە شارەیلیگ ئەمریکی جویر بۆستن هاتوێن.
مەهشەد ٢٨ ساڵان وت: من پڕتاڵ سەوز پووشیل دەسمیەتی ئارا ئازادکردن ئیران بیەن، ئەو خانم گەنجە ک وەرجە سێ ساڵ لە ئیران دەرچگە و نەخوازیە تەواو ناو خوەی ئاشکرا بکەێد چوینکە هیمان خیزانەگەی هانە ناو وڵاتەگە، وتیش: دی ئی رژیم ستەمدارە نیەخوازیمن ک نیەیلێد سوود لە مافەیل مرۆییمان وئازادیمان بگریمن.
