واشنتۆن سزای کۆمەڵەیگ "خێرخوازی" لوبنانی دەێد وە توومەت پۊیل کلکردن ئەرا حزبوڵلا

واشنتۆن سزای کۆمەڵەیگ "خێرخوازی" لوبنانی دەێد وە توومەت پۊیل کلکردن ئەرا حزبوڵلا
2026-11-19T07:53:12+00:00

شەفەق نیوز- وەدویاچگن

ویلایەتە یەکگرتگەیل ئەمریکا، چەسپانن سزایەیل ئەرا بان کۆمەڵەیگ خێرخوازی کە لە باشوور لوبنان چالاکی کەێد راگەیان، و توومەتباری کرد وە کلکردن وەخشینەیل ئەرا حزبوڵڵا، و وەکارهاوردن چالاکییە مرۆییەیلی جویر پەردەیگ ئەرا گواستنەوەی ئەندامەیلی و ئەمارکردن چەکەیلی، لە چوارچمگ تەقەلایل واشنتۆن ئەرا سنووردارکردن سەرچەوەیل پۊیل کلکردن ئەرا حزبەگە و هەژموون ئیرانی لە لوبنان.

وەزارەت خەزێنەی ئەمریکی وت، سزایەیل کۆمەڵەی "وەتەعاوەنوا" کردنەسە ئامانج، کە خزمەتگوزارییەیل فریاگوزاری وەپەلە لە باشوور لوبنان پێشکەش کەێد، و توومەتباری کرد وە کلکردن  پۊیل کلکردن ئەرا "چالاکییە تیرۆریستییەیل" حزبوڵڵا.

وەزیر خەزێنەی ئەمریکیا سکۆت بێسنت، لە بەیاننامەیگ دووپات کرد  واشنتۆن چاوپووشی لە "تەقەلایل رژێم ئیرانی ئەرا دەسدروێژیکردن ئەرا بان سەروەری لوبنان لە رێ بریکارە تیرۆریستییەیل جویر حزبوڵڵا" نیەکەێد، و وتیش، ویلایەتە یەکگرتگەیل وەردەوام بوود لە رێگریکردن لە تەقەلایل ئیران ئەرا پیادەکردن هەژموون لە ناوچەگە و پۊیل کلکردن ئەرا گرووپەیل سەر وە پی.

وەزارەتەگە ئاشکرا کردەو  سزایەیل لە چوارچمگ زیایکردن فشار ئەرا بان تووڕەیل پۊیل کلکردن نایاسایی سەر وە حزبوڵڵا تیەن.

لە لای خوەیەو، وەزارەت دەیشت ئەمریکی کۆمەڵەگە توومەتبار کرد وە قۆستنەوەی چالاکییە مرۆییەیلی ئەرا گواستنەوەی ئەندامەیل حزبوڵڵا و ئەمارکردن چەکەیل سەر وە پی لە باشوور لوبنان، لە ژیر پەردەی پێشکەشکردن دەسمیەتی و فریاگوزاری وەپەلە، لە وەختیگ راگەیاننە ئەمریکییەگە هویچ جواویگ وە لایەن کۆمەڵەگەو دەربارەی ئی توومەتەیلە لە خوەی نەگرد.

Shafaq Live
Shafaq Live