واشنتۆن ئاخڵەی دەریایی وەبان تەهران تونتر کەێد.. ئیران وە مووشەکە نووەیل هووشداری دەێد

شەفەق نیوز ـ واشنتۆن / تەهران

فەرماندەیی ناوەن ئەمریکا "سەنتکۆم"، ئمڕوو سێشەممە، راگەیان  وەردەوامە لە چەسپانن ئاخڵەی تەواو دەریایی وەبان ئیران لە دەریای عەرەب، و دیاریکرد ئەرا  ئاڵشتکردن ری 94 کەشتی بازرگانی و وسانن 3 کەشتی تریش، ئەرا دڵنیابوین لە پابەندبوین وە پرۆسەی ئاخڵەدانەگە.

لە وەرانوەر، ئەمیندار گشتی ئەنجوومەن باڵای ئاسایش نیشتیمانی ئیران، لیوا محسن رەزایی، لە تووماریگ لە پلاتفۆرمی «X» دووپاتیکرد  واشنتۆن لە ری مووشەکە نووەیل ئیرانیەیل "هووشدارییگ رووشن" وەرگردیە، و هەڕەشەی چەسپانن ناوچەی قەیەغەی دەریایی لە گشت ئاو کەنداو کرد، جواو ئەوەگ کە ناو "جەنگی ئابووری"لەلی نایە، وەگەرد وەپیاچگن وە بارودخ ئۆپراسیۆنەیل دژ وە بنکە و کەشتە ئەمریکیەیل.

لەهەمان باوەت، داتایەیل شوینکەفتی کەشتیەل دەرچگ لە کۆمپانیای "کبلەر" و و گواستنەوەی ئاژانس "رۆیتەرز" ، هامشوو دەریایی لەری تەنگەی هۆرمز لە سەرەتای هەفتەگەو کەمەوبویە لەناوڕاس زیایبوین نیگەرانیەگان رەدبوین گەشتیەیل داوەزیایە ئەرا 7 کەشتی لە رووژ دووشەممە بەراورد وە 8 کەشتی لە رووژ گوزەشتەی بویە.