هەڵکشان زویوەزوی ئیسرائیل لە باشوور سوریا.. دەسگیرکردن و چگنە ناو و گورز ماوەی 24 سەعات

شەفەق نیوز- دیمەشق

روانگەی سوری ئەرا ماف مرۆڤ، رووژ سێشەممە، خەوەردا لە دەسگیرکردن گەنجیگ لەلایەن هێزەیل ئیسرائیلی و جیوەجیکردن چەن چگنەناویگ و جویلەیگ سەربازی لە دەورگرد قونەیتەرە و دەرعا لە ماوەی کەمتر لە 24 سەعات، لەوەخت هاودەم وەرد تەقانن بومبەیل رووشناکەر و گورزەیل تووپخانەیی لە ناوچە سنوورییەیل.

 روانگەگە لە بەیاننامەیگ کە ئاژانس شەفەق نیوز چەوی وەپی کەفت، وت کە هێزەیل ئیسرائیلی گەنجیگ لە ئاوایی حورییە لە دەورگرد باکوور قونەیتەرە دەسگیر کردن، بی ئەوەگ زانیاری لەبان مدووەیل دەسگیرکردنەگە یا ئەو لایەنە کە وەرەو پی بریاگە بڕەسێد.

 وتیش کە هێزیگ ئیسرائیلی کە لە نزیکەی پەنج ئامێر سەربازی بوی، شەوەکی ئمڕوو، چگە ناو دەورگرد ئاوایی زوبەیدە لە دەورگرد قونەیتەرە، لەوەخت هاودەم وەرد چگن خوەنەوارەیل وەرەو مەکتەوەیلیان، کە بۊە مدوو رەوشیگ لە دڵەڕاوکێ لە ناوەین خەڵکەگە، بی تومارکردن دەسگیرکردن یا تەقەکردن راستەوخۆ وەرد مەدەنییەیل، وەپەی روانگەگە.

دیاری کرد کە هێزیگ کە لە دوو ئامێر سەربازی ئیوارەی دووشەممە لە دەروازەی تەل ئەبو غەیسار وەرەو ئاوایی سەیدا حانوت لە دەورگرد قونەیتەرە چگە ناو، لە وەختیگ هێزەیل ئیسرائیلی بومبەیل رووشناکەر لە ئاسمان ئاوایی سەمەدانییەی خوەرهەڵات تەقانن، وەگەرد ئامادەباشی مەیدانی لە ناوچەگە.

 لە خان ئەرنەبە لە نزیک ناوچەی پیشەسازی لە دەورگرد قونەیتەرە، هێزیگ ئیسرائیلی چگە ناو ناوچەگە و کەفتە شوین بڕیگ لە ریوارەیل وەرجە ئەوەگ بکییشێدەو، وەپەی روانگەگە.

 لە دەورگرد دەرعای خوەراوا، روانگەگە خەوەردا لە چگن هێزیگ ئیسرائیلی ئەرا ناو هەردگ ئاوایی عارزە و مەعریە لە ناوچەی حەوز یەرموک، لە ناوڕاس بڵاوبۊن و جویلەی مەیدانی، بی رەسین زانیاری لەباوەت تەقەکردن یا دەسگیرکردنەیل.

هەمیش هێزەیل ئیسرائیلی، وەپەی روانگەگە، پەلامار تەپەی حەمریە لە نزیک ئاوایی تەرەنجە لە دەورگرد باکوور قونەیتەرە وە گولەی تووپخانە کردن، بی زانیاری لەبان زەرەدەیل گیانی یا مادی.

 وەپەی روانگەگە، یەیش لەژیر سای وەردەوامبۊن چگنە ناو و جویلە سەربازییەیل ئیسرائیلی لە ناوچەیل باشوور سوری تیەێد، لە وەختیگ داوا لە نەتەوە یەکگرتگەیل و کۆمەڵگەی ناودەوڵەتی و هێزە کاراگەیل کرد جویلە بکەن ئەرا کەمەوکردن ئی جویلەیلە و پاراستن مەدەنییەیل.