هندستان چەم چیناب لە پاکستان بڕێد

شەفەق نيوز/ ئاژانس Press Trust of India، لە زوان سەرچەوەیگ وت: دەسەڵاتەیل هندی وەشیوەیگ وەختانە، تەکان ئاو چەم چیناب لە بەنداو باجليهارەو لەبان سنوور پاکستان بڕیە.

سەرچەوەگە وتیش؛ حکومەت هندستان پلان دیرێد ئەرا ریکارەیلیگ وەیجویرە لە بەنداو كيشانجانجا لەبان چەم جيلوم.

پسپۆڕەیگ ئاگادار ئەرا ئاژانسەگە وت: وێستگەیل وزەی کارۆئاوی لەبان باجليهار لە رامبان لە جامو وكيشانجانجا باکوور كەشمير تاوانای رێکخستن وەخت تەکان ئاوەگە وە هندستان دەێد.

جی باسە کە وەکارهاوردن بەنداوەیل باجليهار وكيشانجانجا، جی ناکۆکی بوی ئەرا ماوەی دویرودرویژیگ ناوەین هندستان و پاکستان، و ئیسلام ئاباد روی وەرەو بانک ناودەوڵەتی کرد ئەرا ناوجیکردن لەی باوەتە.

جاران پەیماننامەی ئاو چەم سند لە ساڵ 1960 ناوەین هندستان و پاکستان بوی، کە ماف کۆنتڕۆڵکردن چەم سند و باڵەیلی لە چەم چیناب و جیلوم وەپی دریا، وەلێ هندستانیس وەگورەی ئەو رێککەفتنە توەنێد ئاوەیان ئەرا ئاویاریکردن زەویە نزیکەیل و ئەرا خوازینەیل خەڵک ئەو ناوچەیلە وەکار بارێد.