نەهامەتی کووچبەرەیل لە دەریای ناوڕاس.. تەرمەیل گیر کەنە تووڕ ماسیگرەیل
لە وینەیل ئەو نەهامەتیە، ماسیگریگ لە تونس تووڕەگەی فڕە دا ناو ئاو دەریا، و لاشەی کووچبەرەیلیگ لەجیای ماسی دراورد.
ئوسامە دریبی ئەو ماسیگرە لە تەمەن ٣٠ ساڵان ئویشێد: لە کناراو خوەرھەڵات وڵاتەگە ماسی گردیاد، و نیەزانێد تووڕەگەی چە گرێد.
بی بی سی لە ژوان ماسیگرەگە وت: لەی دویاییە تەرم ١٥ کووچبەر لە تووڕەگەی گیر کردێە، لە نزیک شار سفاقس، ئەوەیش وە تەنیا سێ ڕووژ.
لەوە خراوتر، ئەو ماسیگرە لاشەی مناڵیگ کوورپە پەیا کرد، و ئەسر چەو خوەی نەگرد، و دەس نادە گیرستن.
ئوسامە وتیش: لە تەمەن دە ساڵان تا ئیسە لەناو ئی ئاوە ماسی گرێد، وەلێ نەهامەتییگ وەیجویرە نەیە.
وتیش: سێیان لە هاوڕیەیلی بەلەمەیلیان فرووشتنە قاچاخچیەیل تا وە دزیەو کووچبەرەیل بوەن، و ئەوانەیش پویل خاسیگ دەن.
ئوسامە وتیش: چەن جاریگ رازی نەویە بەلەمەگەی بفرووشێد، چوینکە رخی چوود کەسیگ بخنکێد، و ئیجا تا هەمیشە دڵ خوەی خوەێد.
