نەفت جیگیر بوود لە ناو نیگەرانییەیل زیایبوین خستنەڕوی و سوود وەگەرد گرژییەیل هورمز
شەفەق نیوز - وەدویاچگن
نرخەیل نەفت، ئمڕوو پەنجشەممە، جیگیربوین توومار کردن لە دویای داوەزیانیان لە وەختیگ وەرجە ئیسە، وەگەرد فرەوبوین مەزەنەیل زیایبوین خستنەڕوو و بەرزەوبوین نرخەیل سوود، کە فشار خستە بان مەعنەویات بازاڕ وەبان ئەو پشتگیرییە کە لە ئەنجام پەلاماردان کەشتییەیل لە گەرووی هورمز لە ناوەڕاس وەردەوامی جەنگ ئیرانی دروس بویە.
خام برێنت 17 سەنت، یا 0.18% بەرزەو بوی، و رەسیە 92.12 دۆلار ئەرا هەر بەرمیلیگ، لە وەختیگ خام خۆرئاوای تەکساس ناوەن ئەمریکی 9 سەنت، یا 0.11% داوەزیا، و رەسیە 83.17 دۆلار.
برێنت لە دانیشتن گوزەشتە وە رێژەی 1.3% داوەزیا بوی، لە وەختیگ خام ئەمریکی وە رێژەی 3.2% داوەزیا ئەرا نزمترین ئاست لە 26 ئاب/ئۆگەستەو، وەگەرد مەزەنەیل زیایبوین خستنەڕوو و گلەخواردن بارە نەفتییەیل لە رێ گەرووی هورمز ئەرا ئاستەیلیگ نزیک لە وەرجە جەنگ.
هەمیش مەزەنەیل بەرزەوبوین نرخەیل سوود ئەمریکی فشار خستنە بان نرخەیل، لە ناوەڕاس نیگەرانییەیل لە یەواشی ئەوزەڵ ئابووری و داوەزیان داواکاری لەبان نەفت، وەرد بەهێزبوین دۆلار، کە خام نرخدارکریاگ وە دۆلار ئەرا سەنینکارەیل دەیشت ئەمریکا گرانترەو کەێد.
کۆنویسی کۆبوینەوەی ئەنجومەن یەدەگ فیدراڵی ئەرا مانگ تشرین یەکەم/ئۆکتۆبەر، کە چوارشەممە دەرچگ، مەزەنەیل وەبەرهێنەرەیل دەربارەی ئەگەر بەرزکردن سوود لە کۆبوینەوەی کانوون یەکەم/دیسەمبەر ئەرا سنووردارکردن هەڵاوسان بەهێزتر کرد.
فشارەیل هەمیش زیاتر بوین لە دویای بەرزەوبوین ئەمارەیل نەفت خام ئەمریکی وە زیاتر لەوەگ مەزەنە کریا بوی، چوینکە ئیدارەی زانیارییەیل وزە زیایبوینیگ وە بڕ 3.4 ملیۆن بەرمیل ئەرا 417.8 ملیۆن بەرمیل لەو هەفتە راگەیان کە لە 13 تشرین دۊیەم/نۆڤەمبەر کۆتایی هات، وە بەراورد وەگەرد مەزەنەیل زیایبوینی وە بڕ 58 هەزار بەرمیل.
لە وەرانوەر ئەوەگ، هیمان رخداریەیل دابینکردن لە خوەرهەڵات ناوڕاس هەس، چوینکە میدیایل ئیرانی باس لەوە کردن کە هێز دەریایی ئیرانی لەکارکەفتن سێ کەشتی نەفتهەڵگر راگەیان کە لە خوەرهەڵات گەرووی هورمز وە مدوو مینەیل دەریایی گەشت کردن.