نەڵا لە بەرزترین ئاستی لە مانگەیلیگەو

شەفەق نیوز- جەهان

نرخەیل تەڵای جەهانی، ئمڕوو دووشەممە، بەرزترین ئاست خوەیان لە ماوەی زیاتر لە سێ مانگ توومار کردن، وە پاڵپشتی لە لاوازی دۆلار، لە وەختیگ سەرنجەیل وەرەو داتایەیل هەڵاوسان ئەمریکی سەرەکی و وتار سەرۆک ئەنجومەن یەدەگ فیدراڵی کیڤن وارش لە وەختیگ دۊاتر لەی هەفتە ئاڵشت بۊ.

 نرخ زەڕ دەسوەجێ وە رێژەی 0.8% وەرەو 4641.27 دۆلار ئەرا هەر ئۆنسەیگ بەرزەو بۊ، تا سەعات 04:27 وەپای وەخت گرینچ، دۊای ئەوەگ لە وەختیگ وەرین بەرزترین ئاستی لە 15 مایۆ/ ئایار توومار کردۊد. و نرخەیل هەفتەی گوزەشتە وە زیاتر لە 5% بەرزەو بۊن.

هەمیش گرێبەستەیل ئاییندەیی ئەرا تەڵای ئەمریکی وە رێژەی 0.4% وەرەو 4697.70 دۆلار ئەرا ئۆنسەیگ بەرزەو بۊن.

 دۆلار ئەمریکی لە نزیک نزمترین ئاستەیلی لە چەن مانگیگەو ناجیگیر بۊ، لەناو بازاڕیگ شێویاگ وە مدوو پەیمان وەزارەت گەنجینەی ئەمریکی ئەرا لەنوو سەنین بڕ زیاتریگ لە قەواڵەیل مەودا دریژ. و لاوازی دۆلار هیلێد سەنین زەڕ وە دراو ئەمریکی کەم خەرجتر بوود ئەرا هەڵگرەیل دراوەیل ترەک.

 بازاڕەیل چەوەڕی داتایەیل نیشاندەر نرخەیل خەرجکردنەیل وەکارهاوردن کەسی ئەرا مانگ یۆلیۆ/ تەمموز کەن، لە پاڵ وتار سەرۆک یەدەگ فیدراڵی کیڤن وارش لە کۆڕ جاکسۆن هۆڵ ئی هەفتە، ئەرا فتراقکردن وەدۊای نیشاندەرەیل نوویگ لەباوەت مەزەنەیل نرخەیل سوود ئەمریکی.

 لەبان ئاست جیۆپۆلەتیکی، ویلایەتە یەکگرتگەیل هوشداری دا ئیران وە ئەوەگ وەسفی کرد وە "گەوراترین پەلامار دارایی لەبان گشت"، لەناو چوارچیوەی ئامادەکاریی ئەرا سەپاندن سزایەیل ئابووری کە هاوبەشەیل بازرگانی ئیران کەێدە ئامانج. و نرخەیل نەفت وە زیاتر لە دۆلاریگ ئەرا هەر بەرمیلیگ نزمەو بۊن وەگەرد دەسخستن قازانجەیل لەلایەن وەبەرهێنەرەیل وەرجە راگەیانن چەوەڕیکریاگەگە.

و لەناو کانزایەیل ترەک، نرخ زیو دەسوەجێ لەبان 68.98 دۆلار ئەرا ئۆنسەیگ جێگیر بۊ، و پلاتین وە رێژەی 0.1% وەرەو 1878.88 دۆلار بەرزەو بۊ، لە وەختیگ پالادیۆم لەبان 1350 دۆلار ئەرا ئۆنسەیگ جێگیر بۊ.