ژنیگ کار دلیڤری کەێد ١٤ چەقوو دەێد لە خانمیگ چوینکە بەخشیشەگە کەم بویە
شەفەق نیوز/ ژنیگ لە رەسانن پیتزا کار کەێد، ١٤ گلە چەقوو داد لە ژنیگ ترەک چوینکە تەنیا ٢ دۆلار بەخشیش وەپی داگە، لە ویلایەت فلۆریدای ئەمریکا.
پولیس بە ناوچەی ئۆسیولا دویای رەسین راپۆرت لەبان ئەوە کە کەسیگ چگەسە ناو ماڵ خانمیگ و وە چەقوو پەلاماری داگە، و قوربانیەگە پەیا کرد، ژنیگە وەناو میڵیندا ئیریزاری، کە وەچەن چەقوویگ زەخمدار بویە، و ئەرا خەسەخانە بریا.
ژنەگە کەفتە ژیر نەشتورکی لە سویە و سینە و باڵەیل و قولەیل و زگی.
وەرپرس ناوچەی ئۆسیولا لەبان فەیسبووک نویسان کە ئیرنگە تەندروسی ئیریزاری جیگیرە.
دەسەڵاتەیل ژنیگ دیاری کردن وەناو بریانا ئەلفیلۆ لە تەمەن ٢٢ ساڵان، کار رانندەی دیلڤری کەێد، جویر توومەتبار لە تاوانەگە.
وەرپرسەیل وتن: ئیریزاری داوای قیتزا لە دوکان مارکۆس کردیە، و دویای تیم ساعەت توومەتبارەگە رەسیە، و داواکاریەگە رەسانیە کە نرخەگەی ٣٣.١٠ دۆلار کەێد.
وتنیش: ئیریزاری پویل ٥٠ دۆلاری دادە دەسی، تا تەنیا ٢ دۆلار لە زیایەگە جویر بەخشیش بوەێد.
دویای رویداوەگە، ئیریرزاری وت: ئەو خانم رانندە چەوی بەرزەو کرد، و وەیی دەنگ چگەڕی.
وەرپرسەیل وتن: ئەلفیلۆ جاریگ ترەک وەگەرد کەسیگ نەناسیای کە چەکدار بویە هاتیەسەو ئەرا شوین ماڵ قوربانیەگە و چگنەسە ناو ژوورەگەی.
دویای ئەوە، ئەلفیلۆ دەسگیر کریا وە توومەت چگنی ئەرا ناو ماڵیگ وەچەک ئاگرین، و تا ئیسە پولیس نەڕەسیە زانیارییگ لەبان ئەو کەسە کە وەگەردی بویە.
