نزیکەی ٢٠٠ کوشیان وە لافاوەیل خوەرئاوای ئەوروپا
2021-07-18T07:35:09+00:00
شەفەق نیوز/ ئامار قوربانیەیل لافاوە تونەیلەی ئەڵمانیا، شەوەکی ئمڕوو یەکشەممە، رەسیە ١٥٦ کوشیاگ، ک گشت ئامارەگە لە خوەرئاوای ئەوروپا رەسنێدە ١٨٣ کوشیاگ لەلای کەمەو.
لە خراوترین کارەساتیگ سرووشتی ک ئەڵمانیا ئەرا نزیکەی پەنجا ساڵ وەخوەی دوینێد، پۆلیس لە بەیاننامەیگ راگەیان ک ١١٠ کەس لە ولایەت راینلاند- بفتالنز تەنیا مەرگ خوەیان دین، وەرانەوەر ٩٨ کوشیاگ وەگورەی ئامارە وەرین.
هەمیش یەک کەس لە باشوور ئەڵمانیا گیانی لە دەسدا ک لە رووژ ورانەیل فرە رفتیگ واری، وەگورەی ئاژانس فرانس پرس.
هیمان سەدان بیسەروشوون هەس ک ری ئەرا رەسینیگ وەپیان نییە چوینکە پەنگ ئاوەگە ریەیل فرە لە ناوچەیلە بڕیە و هیمان پەیوەندییش وەگەرد چەن شوینیگ بڕیاگە.
