ئیندۆنیسیا.. 66 کوشیاگ و 69 بیسەروشوین وە رۊداو نوقمبۊن کەشتییگ سەرنشینەیل
شەفەق نیوز- جاکارتا
ئامار قوربانییەیل نوقمبۊن کەشتی سەرنشینەیل "ڤێرگۆ ترانسپۆرت 8" لە وەرانوەر کەنارەیل دورگەی کالیمانتان ئیندۆنیسی بەرزەو بۊ ئەرا 66 کوشیاگ، لە وەختیگ هیمان 69 کەس لە شمارەی بیسەروشوینەیلن، وەپەی ئەوەگ راگەیاننەیل ئیندۆنیسی خەوەر دانە.
دەروازەی "کۆمپاس" لە زوان قسەکەر وەناو ئاژانس نیشتمانی ئەرا مینەکردن و رزگارکردن لە ئیندۆنیسیا "باسارناس"، سودایانا، وت کە کەشتییەگە 243 کەس هەڵگردۊد، 174 لەلیان پەیا کریانە، کە 108 رزگاربۊ و 66 کوشیاگ لەناویانە، لە وەختیگ هیمان 69 کەس بیسەروشوینن.
قسەکەرەگە وتیش کە پرۆسەیل مینەکردن چۊنەسە ناو شانزەهەمین رووژیان، لە وەختیگ پیاوەیل رزگارکردن مەزەنە کەن کە بڕیگ لە سەرنشینەیل شایەت هیمان لەناو کەشتییە نوقمبۊگە مەنۊن، و دیارکردن کە بنئاوەیل لەبان کەشتییگ ئەرا مینەکردن و رزگارکردن کل کریانە ئەرا شوین رۊداوەگە.
پرۆسەیل مینەکردن وە دریژایی کەنار ناوچەی کالیمانتان ناوڕاس وەردەوامن، کە ناوچەیل سەرویان و سوکامارا و کۆتاوارینگین خوەراوا لەخوەی گرێد، ئەرا مینەکردن لە دۊای بیسەروشوینەیل.
کەشتی "ڤێرگۆ ترانسپۆرت 8"، کە لە سورابایا وەرەو بانجارماسین چگ، لەناو ئاوەیل ناوچەی کالیمانتان باشوور لە شەو 13 ئەیلول/ سێپتەمبەر گوزەشتە نوقم بۊ، لە وەختیگ ئاژانس "باسارناس" خەوەر دا لە دریژەوکردن پرۆسەیل مینەکردن ئەرا هەفت رووژ زیاتر.
