ئەنجلینا جۆلی: نماز ئەرا گەل ئۆکرانیا خوەنم

شەفەق نیوز/ خانمە هەسارەی جەهانی و باڵیۆز نیازە خاسەیل لەلای نەتەوە یەکگرتگەیل، ئەنجلینا جۆلی، باس لە دڵگرانی خوەی ئەرا سەڵامەتی گەل ئۆکرانیا کرد، لەناو ئەو جەنگ سەربازیە ک وڵاتەگەی وەخوەی دۊنێد، و ئاوارەیی هەزاران ک لە ئاگر قەیرانەگەی ناوبەین رووسیا و ئۆکرانیا وان، و وت: نماز ئەرا گەل ئۆکرانیا خوەنم.

لەپەیامیگ لەبان هەژمار خوەی لە ئینستاگرام، جۆلی شاندکار تایبەت کۆمسیۆن باڵا ئەرا باوەت ئاوارەیل سەروە نەتەوە یەکگرتگەیل نۊسان: زوورم وەگەرد هاوڕیەیلم لە کۆمسیۆن ئاوارەیل هاوردیمنە بان مسۆگەرکردن هەر چشتیگ ک مقیەتی سەرەکی و ماف مرۆڤ ئەرا ئاوارە و کووچبەرەیل ناوچەگە دابین بکەێد. 

ئەو خانمە ئەکتەر ٤٧ ساڵانە وتیش: وەڕاسی نووڕستمە راپۆرتەیلیگ لە زەخمداری و واین کەسەیلیگ لە میلکان خوەیان وەمینەی ئارامی.