نایبەت.. ئاشکراکردن مەوقەی دەسکردن وە دانوسەنین ناوەین ئیدارەی سەروەخوەیی و حکومەت سوریا
شەفەق نيوز/ سەرچەوەیگ ئاگادار، ئمڕوو چوارشەممە، ئاشکرای دیاریکردن رووژ جمعەی ئایندە کرد جویر وەختیگ ئەرا دەسکردن وە دانوسەنین نوویگ ناوەین دەسەی ئیدارەی سەروەخوەیی لە باکوور خوەرهەڵات سوریا و حکومەت سوریا، دووپاتیش کرد کە باوەتەیل وە سەخت و ئاڵووز دانریەن.
سەرچەوەگە ئەرا ئاژانس شەفەق نیوز وت: سەردان دەسەگە جویر زەمینەسازی ئەرا باسکردن لە خاڵەیل ئەو رێککەفتنە تیەێد کە ناوەین مەزڵوم عەبدی فەرماندەی گشتی هەسەدە و ئەحمەد شەرع سەرۆک سوریا لە دەی ئادار گوزەشتە وەڕیەو چگ.
وتیش: بەرنامەی دانوسەنین باوەتەیلیگ گرێدەو پەیوەندی وە دامودەزگایەیل ئیدارەی سەروەخوەیی دیرن، لەلییان لایەنەیل خزمەتگوزاری و ئابووری و سامانەیل ژیرزەوی، وەگەرد پرسەیل خوەنەواری لە ناوچەیل باکوور خوەرهەڵات سوریا.
دەسەی ئیدارەی سەروەخوەیی لە کەسایەتییەیل کورد و عەرەب و سریان و ئاسووری دروس بوود، کە نوینەرایەتیی ناوچەیل کورد کەن وەگەرد پارێزگایەیل ریقە و دێرەزور.
لە وەختیگ ئەندامەیل دویەکە لە فۆزە یوسف ئەندام دەسەی سەرۆکایەتی پەیەدە، و عەبد حامد مهباش سەرۆک حزب سوریا بانان، و ئەحمەد یوسف هاوسەرۆک دەسەی دارایی لە ئیدارەی سەروەخوەیی، سەنحریب بەرسزوم سەرۆک حزب یەکێتی سریانی، و سۆزدار حاجی خانمە ئەندام یەپەژە، و مەریەم ئیبراھیم و یاسر سولەیمان لە پۆست قسەکەر فەرمی دەسەگە.
لەلای خوەییش، بەدران چیا کورد سڵاکار ئیدارەی سەروەخوەیی، رووژ دووشەممەی گوزەشتە ئەرا ئاژانس فرانس پرێس وت: وازهاوردن نییە لە پەڵپ هەمەجویری رژیم سیاسی لە سوریا، دووپاتیش کرد کە باسکردن لە باوەتەیل سەرەکی دانوسەنین بوود.
چیا کورد دیاری کرد کە گفتوگۆ وەرد حکومەت وەختانەی سوریا وەردەوامە، دیاری کرد کە رەسێدە پرسەیلیگ سەخت و ئاڵووز، و درویژەوکردن پیەڵەیلیگ زیاتر لە دڵنیایی ناوەین دوو لایەن خوازێد.
