پەنابەریگ سووری دوو دویەت خوەی کوشێد و خوەی دەێدە دەس پولیس تورکیا
یوسف ئەحمەد ئەو پیاو پەنابەرە لە تەمەن ٥٤ ساڵە وەگەرد ژنەگەی و هەفت مناڵی یە چەن ساڵیگە لەوەر جەنگ سوریا پەنا وە تورکیا بردیە، و هویچ تاوانیگ وەرجە کوشتن ئی دوو دویەتیە نەکردیە، تا خوەی دادە دەس پولیس تورکیا و وتیە من لە مەوقەیگ تویڕە بویمە، دویەکە نیمەڕوو، لە هووش و ئاگای خوەم نەویمە، هەنای هاتمەسە ئاگای خوەم نووڕیمە ک من دوو دویەت خوەم وە چەقوو کوشتمە.
پولیس تورکیا دوو تەرم دویەتەیل کوشیاگ لە ماڵ باوگیان پەیا کرد، و دەسکریا لێکۆڵینەوە لەو ڕویداوە ک کەوسەر ١٧ ساڵان و مەروەی ١٥ ساڵان لەناوی بوینە قوربانی.
کەناڵ عەرەبیە لە زوان کەسەیلیگ پەنابەر سووری لە جادەی نەوروز لە ناوچەی میرام سەروە ویلایەت قونێە لەناوڕاس تورکیا وتنە: باوگەگە مرافەیگ وەرد کەوسەر دویەت گەورەی داشتگە، لەبان شوی دویەتەگەی ک وە توومەت دەسدرویژی سێکسی دەسگیر کریاگە، و رەسیەسە دەمەقاڵیگ، ئیجا ئی دویەتەگەی (مەروە) هاتیەسە ناو مرافەگە، تا باوگەگە وە چەقوو هەردوگیان بکوشێد.
کەوسەر دوو مناڵ دیرێد، وەرجە ماوەیگ شویەگەی وە توومەت دەسدرویژی سێکسی زیندانی کریاگە، ک ئەوە هیشتیە باوگ دویەتەگە تویڕە بوود، و دویەتەگەیش پشتگیری شویەگەی کردیە، تا بویەسە مرافەی گەورەیگ و رەسیە ئی تاوانە.
