مینەکردن سەر خانمە مودێلیگ کوشیاگ لە هۆنگ کۆنگ
2023-02-25T09:17:08+00:00
شەفەق نیوز/ دەسەڵاتەیل هۆنگ، لێکۆڵینەوە لە تاوان کوشتن قەیزەوەنیگ کەن، ک خانمە مودێلیگ و نمایشکار پڕتاڵ لەناوی بویەسە قوربانی.
پولیس هۆنگ کۆنگ خەسویرەیل خانمە مودێل ئابی چوی دەسگیر کردن، دویای ئەوەگ هەردوگ پای دویەتەگە لەناو یەخچاڵیگ پەیا کردن، ئەوەیش دویای چەن رووژیگ لە نەمانی.
پولیس هەنای رەسیە ناو ماڵیگ وە مینەکردن چوی، جیماگەیل گووشت ئایەم لەناو قاجاخ ماڵەگە پەیا کرد.
وەگورەی قسەی ئالان چونگ ک سەرپەرشتیاری لێکۆڵینەوە کەێد، چشتەیلیگ ئەرا بڕین لاشە و دەسکیش و ماسک پەیا کردنە.
تا ئیسە پولیس مینەی سەر و پشت و دەسەیل ئەو دویەتە کەێد.
لێکولینەوەی پولیس نشان دەێد ک چوی لەی دویاییە کەفتیەسە گیچەڵ پویل وەگەرد چەن کەسیگ، وەبی ئاشکراکردن هویردەکارییگ زیاتر.
