مەرافەیگ لە ناوەین دیموکراتەیل و کۆمارییەیل لە کۆنگرێس ئەمریکی

شەفەق نیوز/ میدیایەیل ئەمریکی، ئمڕوو یەکشەممە، ئاشکرا کردن لەباوەت پەیا بۊن دەمەقاڵ و مەرافەیگ لە ناوەین پەرلەمانتارەیل لە کۆنگرێس ئەمریکی لە هەردوگ پارت کۆماری و دیموکراتی لە ماوەی دەنگداین لەبان بڕە کومەکەیل ئەرا ئۆکرانیا.

 توڕ "فۆکس نیوز" ئەمریکی، وت کە مەرافەیگ لە ناوەین کۆمارییەیل و دیموکراتەیل رویدا لە وەخت پرۆسەی دەنگداین لەبان بڕە کومەکەیل ئەرا ئۆکرانیا، و یەیش دۊای ئەوە کە نوێنەرەیل پارت دیموکراتی دەس کردنە بەرزکردن پەرچەم ئۆکرانی لە ناو دانیشتنەگە.

 لەی باوەتەو، مارک مۆلینارۆ پەرلەمانتار لە پارت کۆماری، تومەتبار پەرلەمانتارەیل پارت دیموکراتی کرد وە پیشێلکردن پرۆتۆکۆل دۊای بەرزەوکردن پەرچەم ئۆکرانی، وتیش کە شەکانن پەرچەمەیل دژ وە بنەماگانە، وە دەسنشانکردن ئەوە کە هاوارەیل لەلایەن پەرلەمانتارەیل دیموکراتی بەرزەو بۊن دۊای کۆتایی هاتن وەخت دەنگداین لەبان کومەکە داراییەیل ئەرا ئۆکرانیا.

 توڕە ئەمریکییەگە دەسنشان ئەوە کرد کە ئانا پۆلینا لونا پەرلەمانتار کۆماری لە ویلایەت فلۆریدا، وەرەو لای مایکڕۆفۆنەگە چگ و وت: "ئەو پەرچەم نەفرەتییەیلە بارنە خوار"، ئەوەگ هیشت فرەتر لە کاردانەوەیل زارەکی لە لایەن دیموکراتەیلەو پەیا بوود.

 راند پۆڵ سیناتۆر کۆماری لە ویلایەت کێنتاکی، پارچە ڤیدیۆییگ ئەرا دەنگداینەگە لەبان میدیایەیل پەیوەندی کۆمەڵایەتی بڵاو کرد کە دیموکراتەیل لەتی دەرکەفن و ئاڵایەیل ئۆکرانی هەڵگردنە، وە رەخنەگردن لە داین "ئەو پۊلەیلی کە ئەمریکییەیل وە زەحمەت وەدەسی هاوردنە ئەرا رژێمیگ بیگانەی گەندەڵ".

 ئەنجومەن نوێنەرەیل ئەمریکی پرۆژەی یاسایگ رەد کرد کە کۆمەکەیلیگ تەرخان کەێد وە بڕ 26.38 ملیار دۆلار ئەرا ئیسرائیل، لەناو وەردەوامبۊن جەنگ ئیسرائیلی لەبان کەرت غەزە دۊای پەلامار بزووتنەوەی حەماس "تۆفان ئەقسا"، لە 7 تشرین یەکەم / ئۆکتۆبەر گوزەشتە.

 داتایەیل دەنگداینەگە رەزامەنی 366 ئەندام لە ئەنجوومەن نوێنەرەیل ئەمریکی لەبان پرۆژەی یاساگە نیشان دان، کە ناو نریاگە "یاسای تەرخانکردنەیل ئەمنی تەواوکەر ئەرا ئیسرائیل"، لە وەرانوەر دەنگداین 58 ئەندام لە دژی.

 پرۆژەی یاساگە تەرخانکردنەیلیگ لەخوەی گرێد وە بڕ 4 ملیار دۆلار ئەرا نووەوکردن هەردوگ سیستەم وەرگری ئاسمانی ئیسرائیلی "گومەزی ئاسنین" و "مەقلاع داوود"، و تەرخانکردنەیلیگ وە بڕ 1.2 ملیار دۆلار ئەرا سیستەم چەک وزەی ئاراستەکریاگ "تیشک ئاسنین"، و تەرخانکردنەیلیگ وە بڕ 2.4 ملیار دۆلار ئەرا ئۆپەراسیۆنەیل سوپای ئەمریکی لە ناوچەگە، و تەرخانکردنەیلیگ وە بڕ 3.5 ملیار دۆلار ئەرا سەنن سیستەمەیل چەک و کەلوپەل و خزمەتگوزاری سەربازی پێشکەفتگ، لەڕی بەرنامەی پاڵپشتی دارایی سەربازی بیگانە.