مووشەک حووسییەیل کەشتی نەفت بەریتانی لە دەریای سوور کەێدە ئامانج
![مووشەک حووسییەیل کەشتی نەفت بەریتانی لە دەریای سوور کەێدە ئامانج](https://media.shafaq.com/media/arcella/1708157027481.jpg)
یەحیا سەریع، قسەکەر سەربازیی حووسییەیل یەمەن راگەیان: حوسییەیل کەشت نەفت "پۆلۆکس" بەریتانی وە مووشەک لە دەریای سوور کردە ئامانج.
سەریع لە ئەکاونت خوەی لەبان پلاتفۆرم ئێکس نویسان: " هیزەیل دەریایی لە هیزە چەکدارەیل یەمەن، ئۆپراسیۆن وەئامانجکردن کەشتییگ نەفتی بەریتانی Pollux لە دەریای سوور وە شمارەی گەورەیگ لە مووشەک دەریایی جیوەجی کرد، و وەشاننەگە هویر و کوتپڕ بوی".
وتیش: لە وەردەوامیی ئۆپراسیۆنە سەربازییەیل لە دەریای سوور دژوە کەشتییە ئیسرائیلییەیل یا وەرەو بەندەرەیب فەلەستین داگیرکریاگ چەسپنن تا ئەو وەختەگ دەستدرویژییەگە وسێد و دەس لەبان سەر گەل فەلەستین لە کەرت غەززە هەڵگریەێد. "
یەیش لە وەختیگ تیەێد کە حوسییەیل وەردەوامن لە وەئامانجگرتن ئەو کەشتی و تانکەرەیلە کە وەرەو ئیسرائیل چن و لە ئیسرائیل گلەو خوەن، و هیز دەریایی ئەمریکا و بەریتانیا وە بۆردومان شوین و ئامانجەیل حوسییەیل لە یەمەن وەڵام دەن.
چوارشەممەی گوزەشتە، سوپای ئەمریکا راگەیان؛ حوسییەیل 6 مووشەک بالیست ئەرا دوو کەشتی لە دەریای سوور و کەنداو عەدەن ووشاننە.