ماکرۆن: ئەوەسا وەزبری رەفتار کەیمن وەگەرد ئەوانەگ بەتیە لەناو مەکتەوەیل پووشن
ماکرۆن دووپات کرد کە دەسەڵاتەیل ئەوەسا وە زبری سەختیگ وەگەرد جیوەجیکردن یاسا نووەگە وەگەرد گلەوخواردن خوەنەواری لە هەفتەی ئایندە رەفتار کەن، وتیش؛ ئی یاسای نووە لەبان خوەنەوارەیل زانکۆ جیوەجی نیەکریەێد.
وەگورەی ئاژانس ئەسوشتید پرێس؛ ماکرۆن لەبان ریسگایل پڕتاڵ ئەرا یەکەم جارە قسە کرد، دویای سەردان مەکتەوەیلیگ پیشەیی لە ناو شار فولکۆز لە باشوور فەرەنسا.
لەناو سەردانەگە وت: زانیمن کە خوەنەوارەیلیگ کەفنە تاقیکردن ئاست پابەندبوین وە ریسگاگە، لەوانەیش کەسەیلیگ تەقەلای رویوەرویبوین رژیم کۆمار دەن، دووپات کرد کە نیەتوەنن بچنە ناو پۆلەیل، و ئەوەسا وەزبری وەگەردیان رەفتار کریەێد.
لە قسەیلی لەباوەت چوینیەتی جیوەجیکردن ئی ریکار نووە، ماکرۆن وت: ئەوەسا فەرمانبەرەیلیگ دیاریکریاگ ئەرا ئەو مەکتەوەیل ناسکە کل کریەن، تا دەسمیەتی وەڕیەوبەرەیل مەکتەوەیل و مامووستایل بیەن، تا گفتوگۆ بیناکەر وەگەرد خوەنەوار و بنەماڵەیل بکەن.
رووژ یەکشەممەی گوزەشتە، گابریێل ئەتال وەزیر پەروەردەی فەرەنسا راگەیان کە ئەوەسا پووشین بەتیە لەناو مەکتەوەیل فەرەنسا قەیەغە کریەێد.
