لە پەنجەم شەو ناڕەزایەتی.. ناوخوەی فەرەنسا دەسگیرکردن ٧١٩ کەس راگەینێد
وەزارەتەگە وەرجەیە ئاشکرا کردوێد کە لە شەو جمعە زیاتر لە هەزار و ٣٠٠ کەس دەستگیر کریان، یەیش لە تەقەلای دەسەڵاتدارەیل ئەرا سنووردارکردن خوەینیشاندان و ناڕەزایەتییە جەماوەرییەیل.
قوربانییەگە لەلایەن پولیسیگ لە نزیکەو، لە مەوقەی وەشکین هاتوچو تەقە لە سینەی کردیە و کوشیا، و پولیسە دەسگیرکریایەگە تەمەن ٣٨ ساڵ وە کوشتنی توومەتبار کریا.
ئی باوەتە مشتومڕ لەبان ڕیکارەیل جیوەجیکردن یاسا لە فەرەنسا دروس کرد، کە لە ساڵ ٢٠٢٢، ١٣ مردن توومار کریایە دویای رازینەوین وە پابەندبوین وە فەرمانەیل پولیس.
لە فەرەنسا سەدان کەس پرسەکەر لە شیوەیگ بیدەنگی و نیگەرانی کەفتنە ری، کە رووژ شەممە ئەرا وەخاکسپاردن ئەو هەرزەکارە وەناو نایل دەسوەپی کرد.
سەدان کەس بەشداری لە پرسەی تەرم نایل کردن، لە گەڕەک پاریس لە شار نانتێر، کە لەورا کوشیا، هاووەخت پرسەکەرەیل تابوتە چەرمگەگەی لە مزگەفتیگەو وەرەو قەورسان هەڵگردن.
دەزگایل ڕاگەیانن وتن؛ دەسەڵات ری لە بەشداریکردن رووژنامەنویسەیل لە پرسەگە گردنە، بەشیگیانیش قاو دانە.
لە گامیگ کە رووشنایی خستە بان سەختی قەیرانەگە، سەرۆک ئیمانوێل ماکرۆن سەردانیگ فەرمی ئەرا ئەڵمانیا هەڵوەشانیە، دویای ئەوەگ شەوانە نائارامی لە چەن ناوچەیگ لە فەرەنسا بوی.
حکومەت ئەرا دویرکەفتن لە تونوتیژی، ٤٥ هەزار پولیس لە وڵاتەگە جیگیر کردیە.
