لەناو خەو کوشیانە.. باس ئەو تاوانە ک ئەمریکا هاوەردە لەرزە
ئەو تاوانە لە مانگ تەشرین دویەم گوزەشتە بوی، هەنای چوار خوەنەوار لە زانکۆی ئیداهۆ، و شیوەی قەیزەوەنیگ لەناو ماڵیگ نزیک زانکۆگە کوشیان.
قوربانیەیل لە خوەنەوارەیل زانکۆ بوین، ٣ دویەت و یەک کوڕ، لەناو ماڵیگ لە شار مۆسکۆ لە ویلایەت ئیداهۆ، تەمەنیان لە ٢٠ تا ٢١ ساڵانە.
دوو دەست تریش لەناو ئەو ماڵە بوینە، لە قات یەکەم ماڵەگە خەفتنە، لە وەختیگ هاوڕیەیلیان لە قات دویەم و سێیەم کوشیانە.
یەکیگ لە دویەتەیل شەوەکی هاتە خەوەر، و تەرم برادەرەیلی دی، و ئاگادار پولیس کرد.
وەرجە چەن رووژیگ، پولیس ئەمریکا دەسگیرکردن گەنجیگ راگەیان، گومان لە جیوەجیکردن تاوانەگە لەلی کریاگە، ئەوەیش لە ویلایەت بەنسلفانیا.
براین کوبیرگر، لە تەمەن ٢٨ ساڵان، خوەنەوار دکتۆرا لە بەس دادپەروەری تاوانی و زانست تاوان لە زانکۆی ویلایەت واشینتۆن، ک فرە لە زانکۆی ئیداهۆ نزیکە، ئەوە توومەتبارە.
براین مەوقەی پشوو جەژن لە ماڵ باوانی لە ویلایەت بەنسلفانیا دەسگیر کریا، و ماشینە چەرمگەگەی، ک مەوقەی تاوانەگە لە دەیشت ماڵ قوربانیەیل کریاسە دی، بویە بەڵگە.
ئەوەگ سەرسام و وڕ مەردم کردیە، چە گاڵ ئی گەنجە داگە ئی تاوانە جیوەجی بکەێد، ک براین لە زانکۆیگتر خوەنێد، و هویچ پەیوەندییگ وەی قوربانیەیلە نەیرێد، و تەمەنی وە هەشت ساڵ لەوان گەورەترە.
دویەم کار، تا ئیسە چەک تاوانەگە پەیا نەکریاگە، ک بایەتە چەقوو بویچگیگ بوود.
چشتیگتر ک هیلێد وە سەرسامی بنووڕیەێدە ئی کردەوە، ک پولیس وتیە: بکوشەگە شەفەق وە نیاز جیوەجیکردن تاوان کوشتن لەناو ماڵەگە بویە، و ئی بڕیارە وەناکاو نەهاتیە، و چشتیگ تویڕەی بکوشەگە نەکردیە.
لەبان ئەوەیش، ئی تاوانە مەوقەی خەفتن قوربانیەیل لەناو شەوخوفیان جیوەجی کریاگە، و ئەو دوو دویەتەگە لە قات یەکەم نەکوشتیە، واتە ئی دوو دویەتە هیشتیە، و چیەسە قاتەیل بانین، ک تا ئیسە کەسیگ نیەزانێد ئەرا ئی بڕیارە داگە!.
