لەبان سنوور ئیران نوینی نەما.. بیسەروشوینی ئەو کابرای ئیسپانیە ک وەپا ئەرا مۆندیال قەتەر چوود
شەفەق نیوز/ ڕاپۆرتەیلیگ ئیسپانی و ئینگلیزی، ئمڕوو یەکشەممە، وتن: سانتیاگۆ سانشيز ک لە ئەسپانیا ئەرا قەتەر وپا چوود تا ئامادەی بازیەیل تووپان لە مۆندیال بوود، دویاترین نوینی لە هەرێم کوردستان بویە، گوایە بچوودە ئیران، یە چەن رووژیگە دیاری نییە.
رووژنامەی "ئال مۆندو" ئیسپانی، لە خەوەریگ ئاژانس شەفەق نیوز ئەڵگەردانی کرد، لە زوان میگیل بیرگادو یەکیگ لە برادەرەیل سانشيز وت: دویاترین گلە وەرجە دوو هەفتە وەگەردی قسە کردیە، و رخەیلیگ لەبان بیوەیی ئەو پیاو ٤٠ ساڵە هەس.
بيرگادو وتیش: لە یەک تەشرین یەکەم دویاترین قسەی وەرد سانشيز بویە، و پەیامیگ ئەرای کل کردیە وەرجەیەگ لە هەرێم کوردستان دەرکەفێد، وە دویری پەنج کیلومەتر لە سنوور ئیران، ک تەگبیر بوی وەناو ئیرانەو بچوودە قەتەر.
بیرگادو رخەیلی نشان دا نەگ دەسەڵاتەیل ئیران دەسگیری کردنە، لەسای ئەو شیواشیو سیاسیە لەورا.
رووژنامەی "میترۆ" بەریتانی لە خەوەریگ ئاژانس شەفەق نیوز ئەڵگەردانی کرد لە زوان باڵیۆزخانەی ئیسپانیا لە تەهران وت: بڕیگ لەوەر وینەگردن خوەینشاندانەیل ئیران دەسگیر کریانە.
سانشيز ڕای خوەی ئاڵشت کرد، ک دویای ئەوەگ تەگبیر داشت وەناو عراق بچوودە قەتەر، بڕیار دا روی بکەێدە ئیران، و ئیجا لە ئیرانەو وە دەریا بچوودە قەتەر.
میترۆ وتیش: دویاترین وینە ک لەبان ئینیستاگرام لە یەک تەشرین یەکەم بڵاوی کردیە لەژیری نویسایە دویاترین ئاوای لە باکوور عراق، و کویەیگ لەناوبەین خوەم وئیران هەس، ک لە ئیرانەو چمە قەتەر.
سانشيز وتیش: مناڵەیل لە هەرێم کوردستان لە باوەت مزڵی ئاگادار بوینە و ئەوانیش ئەرا بازیکردن تووپان دەرچگن.
وەرجەیە، ئەسوشیتد پڕس ئەمریکی ڤیدیۆیگ بڵاو کرد نشان ئەو پیاو ئیسپانیە دا هەنای لەناو جادەیل سلێمانی ری کەێد، و عەرەوانەی بویچکیگ وەگورد خوەی کیشێد، و پەرچەم ئیسپانیا ها بانی.
سانشيز یە ١٠ مانگە دەسکردیەسە ریکردن، تا رەسیە هەرێم کوردستان، وە ئومید رەسینی ئەرا تەماشای بازیەیل هەڵوژادەی تووپان ئیسپانیا لە دۆحە.
