لوبنان.. پەیاکردن فڕۆکەیگ مەدەنی کەفتە ناو دەریا
2021-10-15T09:23:30+00:00
شەفەق نیوز/ تیمەیل رزگارکردن لوبنان، ئمڕوو جمعە، پەیای ئەو فڕۆکەی سووکە کرد ک رووژ چوارشەممەی گوزەیشتە وەرانوەر کناراو حالات کەفتە دەریا.
سەمیر یەزبەک وەرپرس رزگارکردن دەریایی وت: سوپا پەیای ئەو فڕۆکەی مەدەنیە کرد ک کەفتە ناو دەریاگە، و لەڕی تەکنیگ سۆنار شۊنەگەی دیاری کریا و دیرن درارنەی.
وەلێ یەزبەک هۊیچ باسیگ لە چارەنووس ئەو دوو گەنجە نەکرد ک لەناو فڕۆکەگە بۊین، و هیمان بیسەروشۊنن.
جی باسە ک ئەو فڕۆکە ک کەفتە دەریا هن فڕکەوانی لوبنانیە، لە مارکەی سیسنا ١٧٢.
وەرجەیە، ميشال عۆن سەرۆک کۆمار داوا لە دەزگا پەیوەندیدارەیلە کرد تەقەلایان بخەنە بان مینەکردن فڕۆکەیە و سوارەیل ناوی.
