له ساڵ 2040 به‌رميليگ نه‌فت ئه‌ڕه‌سێده 100 دۆلار
2017-09-15T11:11:00+00:00
شه‌فه‌ق نيوز/ ئاژانس زانياريه‌يل وزه‌ێ ئه‌مريكى راپۆرتيگ بڵاو كرد و له‌تى ئاماژه وه ئه‌وه كرد ك جه‌هان ناژار ئه‌دێ وزه‌ێ فيشتر وه‌كار بارێد له ماوه‌ێ 20 ساڵ تر ئاينده، ك يه‌يش ماناێ زيايكردن به‌رهه‌م نه‌فته له ده‌وڵه‌ته‌يل خوه‌رهه‌ڵات ناوين له‌وه‌ر پڕه‌وكردن هه‌وه‌جه‌يل بازاڕ.
ئاژانس سه‌ر وه وزاره‌ت وزه‌ێ ئه‌مريكى جه‌خت له‌وه كرد ك وه‌كارهاوردن وزه له جه‌هان وه ريژه‌ێ 26% به‌رزه‌و ئه‌دێ تا ره‌سێده ساڵ 2040 و ده‌وڵه‌ته‌يل ئاسيايى و ئه‌فريقيايش به‌رزه‌وبوين فريه‌يگ وه خوه‌يانه‌و دوينن له وه‌كاربردن و ره‌سێده 41%.
راپۆرت ئاژانسه‌گه ئاماژه وه په‌ره‌سه‌ندن ئابوورييش وه نيمچه شيوه‌يگيش كرد و وت: نرخ به‌رميليگيش نه‌فت له دو ده‌يه‌ێ ئاينده ره‌سێده 100 دولار وه نرخ دۆلار ئمڕوو.
