پەلاماردان سەختیگ لە ماوەی نۆ رووژ... ئیسرائیل مووشەک و توپ واران غەزە کەێد
2023-10-16T07:09:56+00:00
شەفەق نیوز/ دەزگایەیل راگەیان، ئمڕوو دووشەممە، خەوەردان سوپای ئیسرائیلی وە پەلامارداین توون و خەسیگ لەری فرۆکەیل جەنگی و تووپەیل قورسیگ ناوچەیل خوەرهەڵات ناوچەی غەزە کردیەسە ئامانج، لە پەلاماردانیگ کە وە توونوتیژ ناوبریەد وەگەرد نۆیەم رووژ دەسوەپیکردن جەنگەیل کۆتایی وەگەرد حەماس.
وێستگەی RT وت، جادەیل و چواریەیل خوەرهەڵات غەزە لەناوچەی شوجاعیە و بازار جومعە و ناوچەیگ کەفێدە ناوەین کویچەی شوجاعیە و کویچەی زەیتوون گیریانەسە ئامانج، کە ناوبریەێد وە " قوویش ئاگرین".
شەوەکی ئمڕوو دووشەممە، فرۆکەیل و تووپخانەیل سووپای ئیسرائیلی پەلامارەیل توونوتیژ و خەسیگ کرد وەبان ناوچەیل ناوڕاس و باکوور شار غەزە، بویە هووکار کوشیان 5 کەس لە دەستەیل وەرگیری شارستانی و زەخمداری سەختیگ دوو کەس.
وەزارەت تەندروسی فەڵەستین لە غەزە راگەیان، شمارەی قوربانیەیل پەلاماردانەیل ئیسرائیل وەردەوام لە بەرزەوبوینە رەسیەس ئەرا 2670 کوشیان و زەخمداری زیارتر 9600 کەس.
وەپای ئامار فەڵەستینی، نزیکەی 1000 مناڵ و700 ژن کوشیانە وە پەلامارەیل ئیسرائیل، زیارتر لە 2000 مناڵ و1400 ژن تویش زەخمداری جویراجویر هاتنە.
