شۆڕش لە دەوڵەتیگ ئەفریقیا و دەسوەسەکردن سەرۆک
شەفەق نیوز/ ئاژانس رويترز لە زوان دوو سەرچەوەی ئەمنی و دیبلۆماسی لە خوەرهەڵات ئەفریقیا، ئمڕوو دووشەممە، وت: سەربازەیلیگ رۆک کابوری سەرۆک بۆرکینا فاسو لەناو کامپیگ سوپا دەسوەسەر کردنە، دۊیای تەقەکردن فرەیگ لەبان ماڵەگەی شەو یەکشەممە لە واگادوگۆی پایتەخت.
شەو یەکشەممە لەبان دووشەممە، ئاژانس فڕانس پڕش لە زوان وەچەودیەیلیگ وت: دەنگ تەقەکردن لە وەخت دیریگ لە واگادوگۆ رەسیەسە گووش، ک لە خود رووژەگە سەربازەیل ناو چن کامپیگ شۆڕش کردن.
هەنای دەنگ تەقەگە هاتە گووش یەکەمجار فرە بۊی، ئیجا بۊیە بڕبڕ، ئەو مەوقە هەلیکۆپتەریگ بی رووشنایی لەبان ناوچەی ماڵ سەرۆکەگە فڕەی هات.
یەیش دۊیای ئەوە ک دەسەڵاتەیلە لە رووژ شەممە وتن هۊچ شۆڕشیگ سەربازی لە وڵاتەگە نەۊیە. ئاژانس رويترز باس ژنەفتن تەقەی فرەیگ لە کامپ سەرەکی سوپا لە واگادوگۆ کرد.
تەقەکردنەگە لە کامپ "سانجولی لاميزانا" دەسوەپی کرد، ک فەرماندەیی ئەرکان سوپا هاناوی، ئەوەیش لە وەخت زۊییگ نزیکەی پەنج شەوەکی، و تا شەش و نیم دەنگ تەقەگە بۊی.
قسەکەریگ وەناو حکومەتەگە وت: ئەویش دەنگ تەقە ژنەفتیە، و تەقەلا دەێد بزانێد چە بۊیە.
لە بەیاننامەیگ دۊیایین، حکومەت دووپات کرد ک تەقەکردن لە بەشیگ لە کامپەیل سوپا بۊێە، وەلی وت: ئەو باسکردنە ک لەبان شۆسیال میدیا بۊیە ک گوایە سوپا دەسنایەسە بان دەسەڵاتەگە راس نییە.
