شەرع مەوقەی دویریگ ئەرا هەڵوژاردن و نویسانن دەستوور نوو سوریا دیاری کەێد
شەفەق نیوز/ ئەحمەد شەرع (جولانی) سەرکردەی وەڕیەوبردن ئۆپراسیۆنەیل سەربازیی لە سوریا، ئمڕوو یەکشەممە، وت: هاتێ رێکخستن هەڵوژاردن لە وڵات چتلێ ساڵ بکیشێد، و نویسانن دەستوور نزیکەی سێ ساڵ وەپی چوود.
شەرع لە دیداریگ تەلەڤیزیۆنی وت: سەرژماری دانیشتگەیل گشتی خوازیمن وەڕمە جیوەجیکردن هەر هەڵوژاردنیگ ئاشتەوایی لە سوریا، و نووڕیمنە دەستووریگ درویژترین ماوە وەردەوام بوود.
هەمیش وت: سوریا ئمڕوو کەفتیەسە گام دووارە بیناکردن یاسا، و دووپات کرد کە کۆنگرەی گفتوگۆ نیشتمانی گشت پیکاتەیل کۆمەڵگا گردەو کەێد.
مەزەنە کرد سوریا ساڵیگ خوازێد تا هاوڵاتی ئاڵشتوبین ریشەیی بوینێد.
لە لاییگ ترەکر وت: من خوەم وە ئازادکەر سوریا نیەزانم، کە هەرکەسیگ قوربانی پیشکەش کرد وڵات ئازاد کردیە، و گەل سوریا خوەی رزگار خوەی کرد.
لەباوەت خوەینشاندان، دووپات کرد کە مافیگ یاساییە ئەرا هەر هاوڵاتییگ رای خوەی ئاشکرا بکەێد، وەبی رەسین زەرەد وە دامودەزگایل.
لەباوت دامەزرانن یەکرەنگی لە حکومەت گواستنەوەی ئیسە، شەرع دیاری کرد کە ئەو گامە هات چوینکە ئیسە هەماهەنگی ناوەین دەسەڵات نوو خوازیمن، نەک دویرخستن کەسیگ.
لەباوەت بەشیگ لە کارەیل تووڵەسەنین، وت؛ لە چەوڕیکریاگ کەمترە وەچەو قەوارەی قەیرانەگە، کە رژیم وەرین پارچەبوین گەورەیگ لەناو کۆمەڵگای سوریا وەجی هیشت، باوجی دووپات کرد کە گشت تاوانیارەیل سزای خوەیان بەن.
شەرع دووپات کرد کە ئەوەسا "دەسەی ڕزگارکردن الشام" هەڵوەشیەێد، و ئەوەیش لەناو کۆنگرەی گفتوگۆ نیشتمانی ئاشکرا کریەێد.
وتیش: دانوسەنین وەرد هیزەیل هەسەدە کریەێد ئەرا چارەکردن قەیران باکوور خوەرهەڵات سوریا، و دووپات کرد کە کورد بەشیگە لە پیکاتەیل سوریا جیاوە نیەوون، و دووپات کرد کە ری وە پارچەکردن وڵات نیەێد.
هەرلیوا، باس ئومید خوەی کرد کە ئیدارەی نوو ئەمریکا وە سەرۆکایەتی دۆناڵد ترەمپ سزایل لەبان وڵاتەگە هەڵگرێد.
لەباوەت وتارەیل دویایین سعودیە، وت: فرە خاسەر و دووپات کرد کە سعودیە کار ئەرا ئارامی سوریا کەێد، و دەرفەت بەرهەمهاوردن گەورە ئەرای هەس لە سوریا.
