ئەکسێۆس هۊردەکارییەیل گردەوبۊنیگ نهێنی ئەمریکی لەباوەت ئیران و یەمەن ئاشکرا کەێد

شەفەق نیوز- واشنتۆن

ماڵپەڕ "ئەکسێۆس"، رووژ شەممە، ئاشکرا کرد لەباوەت گردەوبۊنیگ نهێنی کە گەورە ئەندامەیل ئیدارەی سەرۆک دۆناڵد ترەمپ لەخوەی گرد و ئەرا چەن سەعاتیگ لە "کامپ دەیڤد" ئەنجام دریا، ئەرا باس لە گامەیل هاتگه لە هەردگ دۆسیەی ئیران و یەمەن.

ماڵپەڕە ئەمریکییەگە دیاری کرد، کە ئیدارەی ترەمپ ئی گردەوبۊن "نائاساییە" رانەگەیانیە، کە سەرچەوەیل وتن جیگر سەرۆک جەی دی ڤانس سەرۆکایەتیی کردگە، و دۊایین جار کە گردەوبۊنیگ هاوشیوە ئەنجام دریا لە یۆنیۆ/ حوزەیران 2025 بۊ، تەنیا چەن رووژیگ وەرجە ئەوەگ ئیسرائیل دەس بکەێدە جەنگیگ دژ وە ئیران.

 لە ناوەین بەشداربۊەیل ترەک، وەزیر دەیشت مارکۆ رۆبیۆ، و وەزیر وەرگری پیت هێگسێس، و نۊنەر کۆشک چەرمگ ستیڤ ویتکۆف، و وەڕێوەبەر ئاژانس هەواڵگری ناوەندی جۆن راتکلیف، و سەرۆک دەسەی ئەرکان هاوبەش جەنەڕاڵ دان کین ئامادە بۊن.

 یەکیگ لە وەرپرسەیل وت: "کارەیل یەکلا بۊنە یا لەلای کەمەو وە قۊلی باس لەلیان کریاگە"، وە دەسنشانکردن ئەرا قەیرانەگە لە خوەرهەڵات ناوڕاس.

ماڵپەڕەگە وتیش کە وەرد پەککەفتن گفتوگۆیەیل، سەرۆک ترەمپ هۊڕ لە دووارە دەسکردن وە ئۆپراسیۆنە جەنگییە گەورایەیل لە ئیران کەێد.