سەرکردەیگ لە سوپای پاسداران لە کوشتن رزگار بوود و پاسەوانەگەی کوشیەێد
شەفەق نیوز/ عەمید فەرماندەی لیوای ١١٠ "سەلمان فارسی" سەرەوە سوپای پاسداران عەمید حسێن ئەلماسی، لە تەقەلای کوشتنی لە شار زاهدان ناوەند پارێزگای سیستان و بلوجستان لە کوشتن رزگار بوی، و یاوەرەگەی کوشیا.
ئاژانس "ئیرنا"ی ئیرانی لە زوان وەچەودیەیلیگ وت: لە تەقەکردنیگ شەفەق ئمڕوو شەممە، شەو "قەدر" لەلایەن کەسیگ نەناسریاگ وەرەو ماشینەگەی عەمید ئەلماسی کریا، و پاسەوانەگەی "مەحمود ئابسالان" کوشیا.
لەوەختیگ سەرچەوەیگ چەودیر ئەرا ئاژانسەگە لە بارەگای "قودس" سەروە سوپای شۆرش ئیسلامی ئیران وت: عەمید حسێن ئەلماسی زەخمدار نەویە.
هەرلیوا، عەلی رزا مەرحمەتی یاوەر پارێزگار سیستان و بلوجستان ئەرا باوەتەیل ئەمنی و پۆلیس دەسگیرکردن ئەو کەسەیلەگ دەسیان لەناو تەقەکردن وەبان خاڵ وەشکینیگ لە زاهدان راگەیان.
وتیش: خاڵەگە کەفێدە دەروازەی شار زاهدان ک شەفەق رووژ شەممە وەلایەن کەسەیلیگ بەدکار کەفتە وەر تەقەکردن.
وتیش: لەی رویداوە مەحمود ئابسالان کوڕ عەمید ئابسالان ( فەرماندەی سوپای پاسداران لە پارێزگای سیستان و بلوجستان) شەهید کریا.
وتیش: ئەوانەگ دەسیان لەناو تەقەکردنەگە بوی دەسگیر کریان، و لێکۆڵینەوە وەگەریان وەردەوامە، ک خوەیان ٤ کەس بوینە لەناو ماشینیگ تەقە لە خاڵەگە کردنە.
