سوپای ئیسرائیل: وەردەوامین لە پەلاماردان ئامانجەیلمان لە ئیران
شەفەق نيوز/ سوپای ئیسرائیل، ئمڕوو شەممە، دووپات لە وەردەوامی هیزەیل ئاسمانیی کرد لە وەردەوامی پەلاماردان ئامانجەیل لەناو زەویەیل ئیران.
لە وەخت زوییگ شەوەکی شەممە، ئیران و ئیسرائیل مووشەک و گورز ئاسمانی ئەرا یەکتری وەشانن، دویای ئەوە کە ئیسرائیل گەورەترین پەلامار وەبان ئیران جیوەجی کرد، تا نەیلێد چەک ئەتۆمی دروس بکەێد.
فیکەی هوشداری لە تەل ئەبیب و قودس کوتا، کە مەردم ناچار بوین روی وەرەو پەناگەیل بکەن، وەگەرد وەشیان شەپوولەیل لەشوینیەک لە مووشەکەیل ئیران لە ئاسمان.
سوپای ئیسرائیل وت: سیستەم وەرگری ئاسمانی نواگیری ئەو مووشەکەیلە کەێد.
سوپای ئیسرائیل لە ساعەتەیل دویایین وت: دەیان مووشەک لە ئیرانەو وەرەو دەوڵەت ئیسرائیل وەشیا، و بەشیگیان نواگیری کریان.
وتیش: تیمەیل رزگارکردن لە چەن شوینیگ لە وڵات کار کەن کە خەوەر لە کەفتن مووشەک رەسیە، دی باس زەرەد و زەخمداری و کوشیان نەکرد.
لە ئیران، ئاژانس تەسنيم نیمچە فەرمی ئیرانی وت: دەنگ چەن رممەیگ لە تەهران پایتەخت رەسیە گووش.
ئاژانس فارس وت: دوو مووشەک داد لە فڕوکەخانەی مهرئاباد لە تەهران، و میدیایل ئیرانی خەوەردان لە هیزگردن ئاگر لەو فڕوکەخانە، کە کەفێدە نزیک شوینەیلیگ سەرەکی ئەرا سەرکردایەتی ئیرانی، و فرۆکەیل جەنگی و هامشوو هاناوی.
میدیایەیل ئیسرائیل وتن: مەزەنە کریەێد مووشەکیگ کەفتیەسە ناو تەل ئەبیب، و رۆیتەرز وە دەنگ و وینە رممەی تەقیان بەرزیگ لە قودس بڵاو کرد.
ئاژانس فارس ئیرانی وت: ئیران بڕەیلیگ لە گورزەیل ئاسمانی، شەممە، جیوەجی کرد، دویای دوو بڕ لە شەو جمعە.
وەچەودیەیلیگ وتن؛ یەکیگ لەو بڕەیلە شەفەق شەممە تەل ئەبیب کردە ئامانج، کە دەنگ رممەی لە پایتەخت و قودس شنەویا.
ئەو گورزەیلە لە وەڵامدان وەبان پەلامارەیل ئیسرائیل وەبان ئیران لە وەخت زوییگ رووژ جمعە تیەن، کە سەرکردە و زانایەیل ئەتۆمی و ئامانجەیل سەربازی و ئەتۆمی گردەو.
