سوپای ئیسرائیل کوشیان ٨٧ کەس وەماوەی یەک مانگ راگەینێد

شەفەق نیوز/ سوپای ئیسرائیل، ئمڕوو جمعە، بڕ کوشیاگەیل ئیسرائیلی، لە سەرباز و مەدەنی، لە ماوەی مانگ ئۆکتۆبەر راگەیان، کە رەسیە ٨٧ ئیسرائیلی.

ئێزگەی سوپای ئیسرائیل وت: ٨٧ ئیسرائیلی لە مانگ ئۆکتۆبەر گوزەشتە کوشیاس، لەناویان ٦٤ سەرباز و ئەندام ئەمنی، و ٢٣ مەدەنی.

دیاری کرد کە ئی کەسەیلە لە جویراجویر بەرەیل جەنگ کوشیانە، چە وە گولەی ئاربیجیر یا مووشەک یا رویوەڕویبوین لە جەنگ.

دویەکە پەنجشەممە، بڕە مووشەکیگ لە باشوور لوبنانەو ئەرا باکوور ئیسرائیل وەشیا، بویە هوکار کوشیان ٧ کەس، چواریان کراکارەیل تایلاندی بوین.