سوپای پاسداران هوشداری ئەرا عراق کل کەێد: ئەگەر پەیمانەگەی جیوەجی نەکەێد جیاخوازەیل داغان کەیمن
2023-09-20T09:25:56+00:00
شەفەق نیوز/ رەمەزان شەریف قسەکەر سوپای پاسدارانی ئیران، ئمڕوو چوارشەممە دووپات کرد کە ئمڕوو گشت ناوچەگە رەسیەسە ئەو ئەنجامە کە بایەسە گرووپە جیاخوازەیل لەناو بچن.
ئەرا دەزگای ئیسنای ئیرانی وت: ئومیدخوازیمن وە پشتبەسین وەو ڕێکەفتنە وەگەرد دەسەڵاتدارەیل عراق کریایە، دویای ٣٠ ساڵ، گرووپ تاوانکاری “کۆمەڵە” نەمینێد.
وتیش: ئەوان لەی هەرێمە دەرکریەن، و ئەگەر عراق پەیمانەگەی جیوەجی نەکەێد ئیمە وە گورزەیلمان هەکاتی جارانی ئەو تیرۆریستەیلە لەناو دەیمن.
شەریف وتیش: ئومێد خوازیمن وە شکستی ئاژاوەگیرەیل ساڵ گوزەشتە و دانوەپیدان ئەو گرووپەیلە هەلومەرجیگ دروس بکەن تا جاریگتر خراوبوین ئاسایش وڵاتەگەمان نەوینیمن لە هویچ بەشیگ وڵات.
هەمیش وت: فرەی ئەو چەکەیلە لە ساڵ گوزەشتە رەسنیە دەس ئاژاوەگیڕەیل، لەڕی کۆمەڵەوە هاتن و هەرچەن لە سایەی وریایی ئیتلاعات سوپای پاسدارانی ئیران، فرەیان پەیا کریایە و فرەیان کوشیانە.
