سعودیە: زەخمداربۊن 13 مەدەنی وە مدوو پەلامارەیل حووسییەیل لەبان شانشینەگە

شەفەق نیوز- ریاز

قسەکەر وەناو هیزەیل هاوپەیمانی وە سەرکردایەتی سعودیە تورکی مالکی، ئمڕوو سێشەممە، خەوەردا لە کەفتن ناوچەیل خەمیس موشەیت و ئەبها و تائیف لە شانشینەگە وە وەر پەلامارەیلیگ کە گرووپ "ئەنساوڵڵا"ی حووسییەیل وە مووشەکەیل بالیستی و فڕۆکەیل بیفڕۆکەوان جیوەجیکردنە.

 مالکی، لە بەیاننامەیگ وت کە "پەلامارەیل بۊنە مدوو زەخمداربۊن 13 مەدەنی، وەگەرد زەرەدڕەسین وە 7 ماڵ نیشتەجیبۊن و دوو ماشین".

 قسەکەر وەناو هیزەیل هاوپەیمانی هەمیش وت، کە "وەردەوامبۊن دەسدریژییەیل رێباز گرووپ حووسی لە پەرەسەنین ئاڵووزی و ئامانجگردن شوینەیل مەدەنی و مەدەنییەیل دووپات کەێد".

 مالکی دووپات کرد، کە هیزەیل هاوپەیمانی وە وەرپرسیارێتی و تونییەو وەرد ئی پەلامارەیلە رەفتار کەن، وە دووپاتکردن تون لەبان ئەوەگ کە گشت رێکارەیل ئۆپەراسیۆنی خوازیاگ گرنە وەر ئەرا ریگری لە گرووپەگە.

قسەکەر وەناو "ئەنسارولڵا"ی یەمەنی عەمید یەحیا سەریع، دۊکە دووشەممە، خەوەر دا لە ئامانجگردن بنکەیگ ئاسمانی لە خەمیس موشەیت لە سعودیە وە مووشەکەیل بالیستی و فڕۆکەیل بیفڕۆکەوان.

فرەی ناوچەیل یەمەن ئاڵووزییگ سەربازی وەخوەیان دوینن لەناوەین حکومەت یەمەنی "دانپیانریاگ ناودەوڵەتی"، و گرووپ "ئەنسارولڵا"، دۊای ئەوەگ ئی دۊاییە لە 13 تەموز گوزەشتە، خەوەردا لە کووتاییهاوردن وە قۆناغ کەمەوکردن ئاڵووزی کە لە کۆتاییەیل 2022ەو کارا بۊ، ئەوەیش دۊای پەلامارەیل ئاسمانییگ کە فڕۆکەخانەی ناودەوڵەتی سەنعا کردنە ئامانج، وەرجە نیشتنەوار فڕۆکەیگ ئیرانی کە لە تارانەو هاتۊد و شاندیگ سەروە گرووپەگە هەڵگردۊد، تا دۊاتر لە فڕۆکەخانەی حودەیدەی ناودەوڵەتی بنیشێدەو.

 ئارامییگ تورت لە یەمەن باڵ کیشاۊد لە وەخت راگەیانن نەتەوە یەکگردگەیلەو لە دۊ تشرین یەکەم 2022، لەباوەت نەڕەسین حکومەت یەمەنی و گرووپ "ئەنسارولڵا" ئەرا رێککەفتنیگ ئەرا دریژەوکردن و فراوانکردن ئەو ئاگربەسە کە 6 مانگ وەردەوام بۊ.

 یەمەن، لە 11 ساڵەو ناڵێد وەدەس ململانێیگ وەردەوام لەبان دەسەڵات لەناوەین حکومەت دانپیانریاگ ناودەوڵەتی و گرووپ "ئەنسارولڵا"، کە کاریگەرییەیلی رەنگ دانەسەو لەبان لایەنە جیاجیایەیل، و بۊسە مدوو قەیرانیگ مرۆیی کە نەتەوە یەکگردگەیل وە یەکیگ لە بەدترین قەیرانە مرۆییەیل لە ئاست جەهان هەژماری کەێد.

 گرووپ "ئەنسارولڵا" لە ئەیلول 2014ەو، کۆنترۆڵ فرەی پارێزگایەیل ناوڕاس و باکوور یەمەن کەن، لەناویانیش سەنعای پایتەخت، لە وەختیگ هاوپەیمانییگ عەرەبی وە سەرکردایەتی سعودیە، لە 26 ئازار 2015، ئۆپەراسیۆنەیل سەربازی دەس وەپیکرد ئەرا پشتگیریکردن لە سوپای یەمەنی ئەرا گلەوداین ئەو ناوچەیلە لە چنگ گرووپەگە.