ساعەت دەس ماکرۆن تویڕەی فەرەنسیەیل کەێد
2023-03-25T06:59:15+00:00
شەفەق نیوز/ ئیمانوێل ماکرۆن سەرۆک فەرەنسا کەفتە وەر رەخنەیل تیژیگ، دویای ئەوە ک لە دیداریگ تەلەفزیۆنی ساعەت گرانبەهای لە دەسی کەنێد، ک دیدارەگە باس سیستەم خانەنشینی کرد.
پارچە ڤیدۆیگ بڵاو بوی نشان دەێد ماکرۆن لەناو چەوپیکەفتن لە پەخش کەناڵەیل خەوەری فەرەنسا ساعەتەگەی لەدەس خوەی کەنێد، وەگورەی خەوەر تووڕ سکای نیوز بەریتانی.
لە پارچە ڤیدیۆگە، ماکرۆن مەوقەی قسەکردنی دەسی جویلنێد، ئیجا نەێدەی ژیر مێزەگە، و ساعەتەگەی کەنێد.
قسەکەرەیلیگ لە زوان ماکرۆن وتن: ساعەتەگە لەبان مێزەگە پڕشنگ دا، ک هیشت بکەنێدەی تا بڵاچەگەی نەێد لە کامیرایل.
بڕیگ کەس لەبان سۆشیال میدیا وتن: نرخ ساعەتەگەی ماکرۆن رەسێدە زیاتر لە ٨٠ هەزار یۆرۆ، باوجی ئیلیزێه ئەرا میدیایل راگەیانن فەرەنسی وت: نرخ ساعەتەگە لە ٢٤٠٠ یۆرۆ زیاتر نییە.
