زەویلەرزەیگ وەتونی 4.9 پلە دەێد لە ناوچەی بوشەهر ئیران

شەفەق نيوز – تەهران 

زەویلەرزەیگ وەتونی 4.9 پلە لەبان پەیمانەی ریختەر، شەوەکی ئمڕوو دووشەممە، داد لە ناوچەی عسلويە لە پارێزگای بوشەهر لە ئیران، وەبی توومارکردن زەردیگ، وەگورەی راگەیانن دەسەڵاتەیل ناوخوەیی.

ناوەند زەویلەرزەناسی لە پەیمانگەی جیوفیزیک لە زانکۆی تەهران وت: لە ساعەت 07:24:32 شەوەکی، لەبان کڕ پانی 27.38 پلە وەرەو باکوور، و کڕ درویژی 52.52 پلە وەرەو خوەرھەڵات، وەقویلی 21 کیلۆمەتر زەویلەرزەگە توومار کریاس.

وتیش: نزیکترین خاڵ ئەرا سەنتەر زەویلەرزەگە وەدویری 14 کیلومەتر لە عسلويە، و34 کیلۆمەتر لە شار كله دار لە پارێزگای فارس، و و37 کیلومەتر لە كوشكنار پارێزگای هرمزكان بویە.

لەلای خوەیەو، وەرپرس ناوچەی عسلويە وت: تا ئیسە هیچ زەرەدیگ گیانی یا دارایی توومار نەکریاس.