زەویلەرزە دەێد لە ژاپۆن
وەگورەی ئاژانسەگە، دویای زەویلەرزەگە کە ناوەندەگەی لە قویلایی ٤٠ کیلۆمەتر بویە و دانیشتگەیل شار تۆکیۆ هەس وەپی کردن، دەستوەجی هویچ زانیارییگ لەباوەت زیان و زەخمداری نەدریاس.
کۆمپانیای تێپکۆ کە وێستگەی ئەتۆمی فۆکۆشیما وەڕیەو بەێد، راگەیان "هویچ تێکچگنیگ" نە لە دامەزراوە ئەتۆمییەگە و نەیش لە ناوچەگە دەسنیشان نەکریاس، وەپەی ئەوەگ ئاژانس فرانس پرێس بڵاوی کردگە.
ژاپۆن ساڵانە سەدان زەویلەرزە وەخوەی دوینێد، هەرچەن فرەیان لەوەر یاسا تونەیل بیناسازی کە دەیان ساڵە وەکارو زیان وەپییان نیەڕەسێد.
رووپێوی جیۆلۆجی ئەمریکا، قەوارەی زەویلەرزەگە وە ٦.١ مەزەنە کردگە، وتیش؛ ئەرا ئەوەگ لە قویلایی ٤٠.١ کیلۆمەتر بویە.
ژاپۆن لە مانگ ئازار ساڵی ٢٠١١ سەختترین زەویلەرزە وەخوەی دی کە گوڕیەگەی ٩ پلە بوی، هەناێ لە ژیر دەریادا لە کەنارەیل باکوور خوەرهەڵات وڵاتەگەی ژاپۆن رویدا و لەئەنجامی تسۆنامی هەڵسیا کە نزیکەی ١٨ هەزار و ٥٠٠ کەس گیانیان لەدەسدان، یا زەخمدار بوین، یا بێسەروشوین بوین.
ئی کارەساتە بویە هوکار رمیان ٣ ڕیاکتۆر ئەتۆمی لە وێستگەی فۆکۆشیما، یەیش خراوترین کارەسات لە ژاپۆن لە دویای جەنگ دروست کرد و سەختترین رویداو ئەتۆمی لە دویای چێرنۆبڵ دروس بوی.
ژاپۆن لە رووژ سەر ساڵ ئمساڵ زەویلەرزەیگ وەتوتی ٧.٥ پلە وەخوەی دی، لە نیمچە دورگەی نۆتۆی گردەو و زیاتر لە ٢٣٠ کەس گیانیان لەدەسدان لە ئەنجام رمیان بینا کوێنەیل.
دویەکە چوارشەممە، ژاپۆن هووشداری تسۆنامی بڵاوکرد، دویای ئەوگ زەویلەرزەیەی تایوان بە تونی ٧.٤ پلە رویدا، بەڵام دویای ئەوە لاوردەی.
جی باسە زەویرزەگەی تایوان بویە مدوو مردن ٩ کەس و نزیکەی ٨٠٠ زەخمدار، وەگەرد کاولبوین دەیان باڵەخانە.
