زانایەیل: هاتێ فلاوەنزای باڵندە بوودە پەتایگ لە کۆڕۆنا گەنتر

شەفەق نیوز/ زانایەیل لە بیماریەیل پەتایی هوشداری دان لە بڵاوبوین ڤایرۆس فلاوەنزای باڵندە، کە توانای بڵاوبوین ناوەین مەردم زیاتر بوود، و هاتێ پەتای کەپیگ دروس بکەێد هەکاتی پەتای کۆڕۆنا یا گەنتر.

دویای توومارکردن ئاگاداری لە یەکەمین تویشهاتن رخدار فلاوەنزای باڵندە لە ئەمریکا لەلای ژنیگ خەڵک لویزانا، ئاشکرا بوی کە ڤایرۆس "H5N1"، لەناو لەشی گەشە سەنیە.

زانایەیل دووپاتیش کردن کە ئەو ڤایرۆسە کە لەناو باڵندە و وڵاخ لە ئەمریکا بڵاو بویە، و بویە هوکار زیاتر لە ٦٠ تویشهاتن سووک لەلای ئایەم، هاتێ رخداریی زیایەو بوود، و بتوەنێد وەڕاستەخۆ تویش ئایەم بارێد.

 ئەو خانمە کە تویش هاتیە لە لویزیانا چگە خەسەخانە دویای دەرکەفتن نشانەیل بیماری سەختیگ لە هەناسەدان، و دەرکەفت کە ڤایرۆس H5N1 لەناو لەشی گەشە سەنیە تا تاوانی زیاترەو بوود لە پەیوەندیکردن وەرد لویلەیل هەناسەدان لەلای ئایەم.

ناوەند دژە بیماری (CDC) دووپات کرد کە ئی بازکوتانە کی نیگەرانیە، وەلێ رخداری بڵاوبوین ڤایرۆسەگە لە ناو مەردم هیمان نزمە.

ئەو خانم بیمارە کە ناوی ئاشکرا نەکریا، تەمەنی ئەوبان ٦٥ ساڵە، و گیچەڵ تەندروسی دیرێد، کە لە باڵندەیگ تویش پەتاگە هاتگە.

تا ئیسە کەسیگ ترەک لەی بیمارە ڤایرۆسەگە نەگردیە.