کۆریای باشوور 7 پرۆژەی تەکنەلۆژی ئاشکرا کەێد و ئامانج داوەزیان وەبان مانگ تا ساڵ 2030 دیرێد
شەفەق نیوز- وەدۊاچگن
کۆریای باشوور، ئمڕوو چوارشەممە، ئاشکرای ستراتیژیەتیگ تەکنەلۆژی تەمادار کرد کە هەفت پرۆژەی سەرەکی لە بوارەیل وزەی ناوەکی و ژمێرکاری بڕی (کوانتۆم) و ئاسمان و تەکنەلۆژیای زیندەیی لەخوەی گرێد، لە چوارچیوەی تەقەلایەیلی ئەرا پەیاکردن بزوێنەرەیل گەشەی نوو کە لە پشت بەسانن وە نیمچەگەڕەسنەیل و زیرەکی دەسکرد رەد بکەێد.
دەسپێشخەری "سێڤن مێجەر سید"، کە لە دیداریگ وە سەرۆکایەتی سەرۆک کۆریای باشوور لی جای میۆنج راگەیەنیا، ئامانجەیلیگ لەخوەی گرێد کە نیشتن وەبان روی مانگ تا ساڵ 2030، و گەشەپیدان کۆمپیوتەریگ بڕی ناوخۆیی وە توانای 100 کیوبیت تا ساڵ 2029، وەگەرد بازاڕکردن بازرگانی ئەرا بەرهەمەیل روکار مێشک و کۆمپیوتەر تا ساڵ 2035 لەخوەی گرێد.
وەزیر زانستەیل پای کیۆنج-هۆن وت، کە هەفت پرۆژەگە کارلەیەکەرە ناوەکییە بۊچگە پێوەرییەیل، و وزەی یەکگردن ناوەکی، و وزەی نووەوبۊ لە نەوەی هاتگ، و تەکنەلۆژیای بڕی، و ئاسمان و فڕین، و تەکنەلۆژیای زیندەیی پیشکەفتگ، و زنجیرەیل دابینکردن کانزا و مادە بنەڕەتییەیل لەخوەی گرێد.
نەخشەگە ئامانج دیرێد ئەرا خەسەوکردن توانای کۆریای باشوور لەبان روویەڕووبۊن خاوەوبۊن گەشەی ئابووری چەوەڕیکریاگ لەبان مەودای دریژ، و سوودوەرگردن لە تەکنیکە نووەیلە کە دی گرنگی رووژوەرووژ زیاتریگ وەدەس تیەرن لەبان هەردوگ ئاست ئابووری و ئەمنی.
کیۆنج-هۆن وت کە حکومەتەگە کار کەێد لەبان پشتیوانیکردن ئی پرۆژەیلە ئەرا گەشەپیدان، وە ئامانج دروسکردن "کۆریای باشووریگ کە هیچیگ ترەک لەماوەی 10 یا 20 ساڵ وینەی نەوود".
