یەک رووژ بی ماشین.. هەڵمەتیگ لە جەزائیر ئەرا مقەیتیکردن ژینگە
2022-12-22T12:05:13+00:00
شەفەق نیوز/ دەسەڵاتەیل دەوڵەت جەزائیر، هەڵمەتیگ وەناو «یەک رووژ بی ماشین» راگەیانن، ک ئەرا سوو جمعە دەسوەپی کەێد، ئەرا باوکردن کەلتور مقیەتیکردن ژینگە، وە قەیەغەی وەکارهاوردن هەر جویر ماشینیگ ئەرا هامشوو.
لەژیر دروشم یەک رووژ بی ماشین، جەزائیر پایتەخت لەی جمعە جادەیلی لە وەکارهاوردن ماشین یا هەر چشتیگ ئەرا هاتوچگن چووڵ بوود، ئەوەیش تا ماوەی ١٠ ساعەت وەردەوام بوود.
دەسەڵاتەیل جەزائیر یە چەن ساڵیگە ئی کارە جیوەجی کەن، وەلێ چوینکە ئمساڵ کەفێدە مەوقەی پشوو مەکتەوەیل، بڕیار دریا سێ جمعە لەبان یەک ئی کارە بوود، ک لە ٢٣ی ئی مانگە، و هەمیش لە ٦ کانوون دویەم ئایندە.
خالد عمارە یەکیگ لە سەرپەرشتیارەیل ئی هەڵمەتە ئویشێد: شمارەیلیگ باس کەن ک سێ مەلیۆن ماشین تیەنە ناو پایتەخت، و بە شمارەی گەپیگە، ئەراوە داوا لە خەڵکەگە کەیمن رووژ جمعە تەنیا وە وەسیەیلەیل حکومەتی هامشوو بکەن، جویر میترۆ و تراموای و پاسەیل گشتی.
