ئیران رەدیکەێد دەس داشتوید لە پەلامارداین وێستگەی ئاو لە کوەیت وئیسرائیل توومەتبار کەێد
شەفەق نیوز - تەهران
ئیران، ئمڕوو دوشەممە، دەس داشتن خوەی لە پەلامارداین وێستگەیگ ئەرا پاکەوکردن ئاو لە کوەیت رەدکرد، و ئیسرائیل توومەتبار کرد وە دەسداشتن ئی پەلامارە ک بویە هووکار زەرەد مادی لە شوینەگە.
ئیبراهیم زولفەقاری، قسەکەر بارەگای خاتەم ئەلئەنبیای سەر وە سوپای پاسداران ئیران، لە بەیانیگ وت: "دەسدرویژی دڕندانەی قەوارەی زایۆنی ئەرا بان وێستگەی پاکەوکردن ئاو لە دەوڵەت کوەیت، وە بەهانەی توومەتبارکردن کۆمار ئیسلامی ئیران، بەڵگەیگە ئەرا دڵپیسی داگیرکەرەیل".
بەیاننامەگە وتیش: "بنکەیل و بەرژەوەنییەیل ئەمریکا لە ناوچەگە، وەگەرد ژیرخان و دامەزراوە سەربازی و ئەمنی و ئابوورییەیل ئیسرائیل، جویر ئامانج هێز وەشێنەر ئیمە مینێدەو".
بەیاننامەگە داوا لە وڵاتەیل ناوچەی خوەرئاوای ئاسیا کرد "هووشیار بوون وەرانوەر پیلانەیل دوژمنەیل ئەمریکای زایۆنی ئەرا شیوانن ئارامی، و کوتایی بێیەن وە بوین سوپای ئەمریکا و زایۆنییەیل داگیرکەر لە ناوچەگە".
ئەوەیش لە وەختیگە ک ئیوارەی یەکشەممە، پەلاماریگ کریاێیدە بان بینایگ خزمەتگوزاری لە یەکیگ لە وێستگەیل کارەبا و پاڵاوتن ئاو لە کوەیت، و بویە هووکار زەرد مادی لە ناو شوونەگە.
