ئیران دەسوەسەر دوو دیپلۆماتکار فەرەنسی کەێد وە توومەت دەسوەردان و سیخوڕی
شەفەق نیوز- تاران
وەزارەت هەواڵگری ئیرانی، ئمڕوو شەممە، راگەیان دەسوەسەرکردن دوو دیپلۆماتکار فەرەنسی وە توومەت دەسوەردان لە کاروبارەیل ناوخۆیی، و باس پەیاکردن واژوو باڵیۆز فەرەنسی وەرین لە تاران لەبان بەڵگەنامەیلیگ کە گریەدریانە وە پرۆژەیگ سیخوڕی.
وەزارەتەگە لە بەیاننامەیگ، کە راگەیانن ئیرانی هاوردیەسەی، وت، کە ئەو دوو دیپلۆماتکارە فەرەنسییە پەیا کریانە لەناو بارەگای دیداریگ نهێنی، مەوقەی جیوەجیکردن فەرمانیگ دادوەری ئەرا دەسگیرکردن دوو توومەتبار لە کەیسیگ پەیوەندیدار وە دزەکردن و دەسوەردان بیگانە، و دیاری کرد کە ناسنامەیان چەسپیاس و وەزارەت دەیشت ئیرانی لە رۊداوەگە ئاگادار کریاسەو.
وتیش کە لێکۆڵینەوە سەرەتاییەیل پرۆژەیگ فراوان ئەرا سیخوڕی و دەسوەردان بیگانە ئاشکرا کردنە، کە ئەنجامداین پەیوەندییەیل نهێنی وەگەرد ئەندامەیل لەناو ئیران و دەیشتی لەخوەی گرێد، و چەودیاریکردن کەسەیل و دروسکردن توڕەیل سیخوڕی، وە ئامانج ئامادەکردن زەمینە ئەرا جۊلەیلیگ کە دەس بەنە سەروەخوەیی وڵاتەگە.
وەزارەتەگە وتیش کە ئەو دوو دیپلۆماتکارە پیشینەی سەرپیچیکردن یاسایەیل ئیرانی و پابەندبۊنەیل دیپلۆماسی دیرن، و دووپات کرد کە دەسەڵاتەیل ئیرانی رێکارەیل پەیوەندیدار وە رۊداوەگە لەڕی کەناڵەیل دیپلۆماسی وەرگردنە.
بەیاننامەگە باس دەرکەفتن واژوو باڵیۆز فەرەنسی وەرین لە ئیران لەبان بەڵگەنامە و رێککەفتنەیل دەسوەسەرگیریاگ کرد کە گریەدریانە وە پرۆژەگە، و داوا لە پاریس کرد ئاشکراکردن فەرمی پیشکەش بکەێد و وەرپرسیاریەتی ئەوەگ وە کردارەیل نایاسایی و دەسوەردان وەسفی کرد بگرێدە مل.
هەواڵگری ئیرانی هوشداری دا کە چەوپووشی لە هیچ رەفتاریگ دەسوەردان لەلایەن دیپلۆماتکارەیلەو نیەکەێد، و هەڕەشەی جیوەجیکردن رێکارەیل تون کرد لە دووارەبۊن سەرپێچییەیل.
